Un «si» para toda a vida: encontros de preparación ao matrimonio no curso 2026/27

• A proposta, baseada na metodoloxía KTNovios, estará guiada por matrimonios que compartirán a súa experiencia e o seu testemuño de fe

A Delegación de Laicos, Familia e Vida deu a coñecer a programación 2026/2027 dos encontros de preparación para as parellas que desexen recibir o sacramento do matrimonio. A iniciativa ofrece un espazo de reflexión, diálogo e acollida no que os noivos poidan abordar, desde a fe, o comezo da súa vida en común e a formación dunha familia.

Baixo o lema «Un “si” para toda a vida», os encontros propoñen unha formación próxima, práctica e actual. As sesións están dirixidas a parellas de toda a diocese e desenvolveranse durante os meses de marzo e abril en Ferrol e Mondoñedo.

Datas, horarios e lugares

En Ferrol ofrécense dúas convocatorias:

· Domus Ecclesiae (Rúa Miramar, s/n), os sábados 6 e 13 de marzo, de 11:00 a 17:00 horas, con comida incluída.

· Parroquia de Santa María de Caranza (Avenida de Castelao, 36), os días 8, 9, 15 e 16 de abril, de 20:00 a 22:00 horas.

En Mondoñedo, os encontros celebraranse no Seminario Santa Catalina os sábados 17 e 24 de abril, de 11:00 a 17:00 horas, con comida incluída.

KTNovios: unha preparación participativa e próxima

A diocese leva dous anos desenvolvendo KTNovios, unha metodoloxía impulsada pola Conferencia Episcopal Española desde 2024. Trátase dunha proposta activa e participativa, con dinámicas vivenciais e en clave de primeiro anuncio, que invita as parellas a tratar os temas esenciais da vida conxugal e familiar á luz da fe.

Os encontros están guiados por matrimonios con experiencia e formación, que acompañan aos noivos desde a súa propia vida e testemuño. A Delegación de Familia valora de forma moi positiva estes dous anos de percorrido, durante os cales a iniciativa axudou ás parellas para atoparse co Evanxeo e cunha Igrexa que las acolle e ponse ao seu servizo.

Inscricións e información

As parellas interesadas poden inscribirse na súa parroquia ou contactar a través do número de WhatsApp 699 417 676, dispoñible tamén para resolver dúbidas. A información sobre os encontros pode consultarse na sección «Noivos» da web diocesana.