“Imos xuntos”: a Igrexa de Mondoñedo-Ferrol inicia un novo curso pastoral

• Preto de 300 persoas compartiron en Mondoñedo unha xornada de fe, escoita e compromiso coa misión

Preto de trescentas persoas reuníronse o pasado sábado no Seminario de Mondoñedo para participar no encontro de comezo de curso, celebrado baixo o lema “Imos xuntos”. A xornada, que coincidiu co Día da Igrexa Diocesana, buscou profundar nos obxectivos do curso pastoral e na implementación do documento sinodal.

Ao encontro asistiron representantes de todos os arciprestados e de numerosas unidades pastorais, entre elas Ferrol, Cariño, San Sadurniño, Ortigueira, Vilalba, Mondoñedo, Ferreira, Foz, Viveiro, Burela e Ribadeo. A xornada reuniu así a parroquias, delegacións, movementos e confrarías ao redor dun mesmo proxecto diocesano.

Unha eucaristía para comezar o camiño

A celebración comezou coa eucaristía, presidida polo bispo de Mondoñedo-Ferrol, don Fernando García, e concelebrada por numerosos sacerdotes. Na súa homilía, o prelado invitou a descubrir a beleza de pertencer a unha Igrexa concreta como a diocese de Mondoñedo-Ferrol.

A partir do lema diocesano, “Deus conta contigo”, o bispo subliñou que o Señor conta con cada bautizado para continuar a misión de Xesús: acoller o amor de Deus e levar a esperanza que necesita o mundo. Tamén lembrou que este camiño debe realizarse desde la sinodalidade, escoitando, camiñando xuntos, cultivando a espiritualidade, participando e actuando con transparencia.

Talleres e credencial sinodal

Tras a celebración eucarística, presentouse o obxectivo do curso: impulsar en parroquias, delegacións, arciprestados, movementos e confrarías os materiais publicados para favorecer unha conversión pastoral.

O encontro contou coa presenza de Fano, debuxante cristián procedente de Málaga, que ofreceu un relatorio con debuxos e cantos sobre la Iglesia sinodal. Fano comparou a Igrexa cunha orquestra: unha comunidade chamada a complementarse na diversidade e a avanzar en harmonía. A súa intervención abriu un espazo de reflexión sobre a comuñón, a participación e a corresponsabilidade de todos os bautizados na misión.

Despois dunha pausa para o café, os participantes distribuíronse en sete grupos e percorreron, de forma rotatoria, polo menos tres dos talleres organizados ao redor da comuñón, a participación, a misión e a espiritualidade. En cada taller recibiron un selo acreditativo da Credencial da Sinodalidade, como testemuño do percorrido formativo realizado.

Compartir a experiencia

A comida foi un momento de encontro e fraternidade entre os asistentes. Pola tarde, Fano retomou o ton festivo da xornada con debuxos, cancións e experiencias que invitaban a recoñecer a fe como agasallo e a sentirse enviados a compartir o vivido.

O bispo Fernando García agradeceu a participación de sacerdotes e axentes de pastoral e subliñou que a xornada permitiu descubrirse máis como Igrexa diocesana. “Sentir a fermosura de ter xuntos un mesmo proxecto e proxectarnos no futuro desde as claves que o Espírito nos quere levar”, expresou.