Os bispos de Galicia aproban a creación da Oficina de Sostemento da Igrexa

• O novo organismo, que terá sede en Santiago, impulsará a corresponsabilidade dos fieis, o asesoramento ás parroquias e a transparencia na xestión económica

O arcebispo de Santiago, monseñor Francisco José Prieto, e os bispos de Lugo, monseñor Alfonso Carrasco; Ourense, monseñor Leonardo Lemos; Mondoñedo-Ferrol, monseñor Fernando García; e Tui-Vigo, monseñor Antonio Valín, aprobaron a creación da Oficina de Sostemento da Igrexa en Galicia, que terá a súa sede en dependencias do Arcebispado de Santiago e prestará servizo ás dioceses da provincia eclesiástica compostelá.

O organismo nace cunha aprobación inicial de tres anos. A súa constitución quedou recollida nun decreto asinado no mosteiro da nosa Señora da Mercé de Poio o pasado 22 de setembro.

Implicar aos fieis nunha responsabilidade compartida

A iniciativa busca unir esforzos para atender as necesidades da Igrexa e favorecer a participación dos fieis no seu sostemento. Esa colaboración permite dispoñer dos medios necesarios para o culto, o apostolado e a caridade. Unha das súas principais tarefas será impulsar campañas comúns xunto coas comisións diocesanas de sostemento. Tamén promoverá a formación en corresponsabilidade para que os fieis coñezan as necesidades das súas comunidades e se impliquen na súa atención. A cooperación entre as dioceses permitirá elaborar materiais e estudos comúns que sirvan de apoio a este labor.

Apoio ás parroquias e transparencia económica

A oficina ofrecerá asesoramento técnico ás dioceses e parroquias, fomentará as boas prácticas administrativas e promoverá a formación de quen asume responsabilidades na xestión económica. A transparencia será un dos eixos da súa actividade. Neste sentido, as súas funcións abarcarán o estudo de necesidades, a elaboración de propostas, a coordinación e o asesoramento. Tamén se encargará de executar as iniciativas comúns que aproben os bispos. O novo organismo actuará sempre en coordinación con cada bispo e respectará a autonomía de cada diocese. O seu traballo desenvolverase xunto cos ecónomos e os responsables diocesanos de sostemento.

Unha sede en Santiago e unha dirección conxunta

A cargo da oficina haberá un director ou coordinador interdiocesano nomeado conxuntamente os bispos. Unha Comisión Permanente de Seguimento supervisará a súa actividade. Estará integrada polo bispo delegado e, segundo determine cada diocese, pola vicaria da área, o ecónomo ou o director da Oficina Diocesana de Sostemento.

A nova Oficina de Sostemento da Igrexa en Galicia enraíza nunha liña de traballo xa presente nas dioceses. Mondoñedo-Ferrol participou nas V Xornadas de Sostemento da Igrexa, organizadas pola Conferencia Episcopal Española en Madrid os días 8 e 9 de outubro, un encontro centrado na corresponsabilidade eclesial e nas novas formas de participación ao servizo da misión. Podes consultar a crónica completa neste enlace.