“Imos xuntos”: a Diocese de Mondoñedo-Ferrol convoca o Encontro de Comezo de Curso

• A xornada, aberta a toda a diocese, celebrarase o 7 de novembro no Seminario de Santa Catalina de Mondoñedo e poñerá o acento na sinodalidade
• Contará coa participación do coñecido debuxante FANO

A Diocese de Mondoñedo-Ferrol convocou para o próximo 7 de novembro o seu Encontro de Comezo de Curso, que se desenvolverá baixo o lema “Imos xuntos”. A xornada está aberta a todas as persoas que o desexen, cunha especial invitación aos axentes de pastoral das delegacións, parroquias e UPA, así como aos membros de movementos e confrarías.

O encontro pretende ser un espazo de reflexión sobre a sinodalidade, que se configurará como o eixo vertebrador do curso pastoral. Tal e como acordou o Consello Diocesano de Pastoral na súa última reunión, a diocese iniciará durante este curso un proceso de avaliación das dinámicas sinodais propostas no desenvolvemento ordinario da pastoral, en sintonía co camiño que percorre toda a Igrexa universal.

Planning do encontro

A xornada dará comezo ás 10:30 horas coa celebración da eucaristía, presidida polo bispo diocesano, na capela maior do Seminario de Santa Catalina de Mondoñedo. A continuación terá lugar a presentación do encontro, na que participará FANO, recoñecido debuxante que acompañará aos asistentes durante toda a xornada.

Tras unha pausa para o café, desenvolveranse diversos talleres. Os participantes poderán percorrer tres deles, a modo de pousadas, e completar así o seu carné de peregrinos, unha proposta pensada para axudar a comprender mellor que é a sinodalidade e como vivila no día a día.

Despois da comida, que poderá ser libre ou realizarse mediante inscrición previa, a xornada concluirá cun momento festivo con FANO no salón de actos do Seminario.

Inscrición ata o día 5 de novembro

As persoas interesadas deberán inscribirse na súa parroquia/arciprestado antes do xoves 5 de novembro. No Seminario ofrécese a posibilidade do xantar con prazas limitadas (12,00 €), polo que hai que reservar antes dese día 5. Tamén se pode levar a comida para compartir. En canto ao transporte, organizarase desde cada arciprestado. Desde a organización poñerase ao dispor un servizo de autobuses para facilitar o desprazamento dos asistentes.

DESCARGA Carta do Encontro (PDF)
DESCARGA Axenda pastoral do curso 2026-2027 (PDF)