Cáritas Diocesana convoca a V Andaina Solidaria «Memorial Carmela Primo» o 6 de xuño

• A cita terá lugar o sábado 6 de xuño, cun percorrido de 7 quilómetros e saída en Ferrol e Neda para rematar en Narón
• Os dorsais poden adquirirse nas Cáritas parroquiais, no Centro de Inclusión Social GVS, nas confrarías da Semana Santa Ferrolá ou por internet
• A iniciativa busca visibilizar e apoiar o labor de Cáritas coas persoas en situación de vulnerabilidade

Cáritas Diocesana de Mondoñedo-Ferrol dá inicio á V Andaina Solidaria “Memorial Carmela Primo”, unha iniciativa que se celebrará o sábado 6 de xuño e que ten como obxectivo visibilizar o labor social da entidade e recadar fondos para a atención das persoas máis vulnerables. A proba, de carácter popular e solidario, contará cun percorrido de 7 quilómetros entre Ferrol, Neda e Narón.

A andaina partirá dos Cantóns de Molíns, en Ferrol, ás 11:00 horas, e concluirá na Praza de Galicia, en Narón, cun tramo polo Camiño Inglés. A inscrición ten un prezo de 8 euros e pode formalizarse nas Cáritas das UPA e parroquias, na recepción do Centro de Inclusión Social GVS, nas sedes das confrarías da Semana Santa Ferrolá ou en liña, a través do código QR do cartel ou do formulario online habilitado pola organización.

Dorsal e camiseta conmemorativa

O pago do dorsal poderá realizarse en efectivo nos puntos de inscrición presencial, mediante tarxeta bancaria na web de Cáritas Diocesana ou a través de Bizum no número 38378, seleccionando a opción de “facer donativo”. Segundo informa a entidade, a achega económica acolle a dedución fiscal prevista na lexislación vixente, polo que Facenda devolve o 80 % dos primeiros 250 euros doados .

A participación inclúe tamén unha camiseta conmemorativa, que se entregará o venres 5 de xuño, entre as 10:00 e as 20:00 horas, na tenda Moda-Re situada na primeira planta do centro comercial Odeón, en Narón.

Compromiso coas persoas en situación de vulnerabilidade

Desde Cáritas lembran que os fondos recadados se destinarán aos programas de atención a persoas maiores en situación de soidade, familias e infancia en exclusión social, persoas sen fogar, acollida nas Cáritas parroquiais, emprego e formación.

A organización anima á cidadanía a sumarse a esta convocatoria solidaria, que combina deporte, compromiso social e apoio concreto ás persoas que atravesan situacións de especial vulnerabilidade.