Encontros, formación e homenaxe ao clero na axenda de maio

• Seis sacerdotes da diocese serán homenaxeados polos seus aniversarios de ordenación na festividade do patrón do clero secular o vindeiro 11 de maio

A delegación diocesana do Clero encara a recta final do curso pastoral con varias convocatorias dirixidas aos sacerdotes durante o mes de maio, que combinan celebración, formación e encontro.

O luns 11 de maio, ás 10:30 horas, terá lugar en Mondoñedo a celebración da festa de San Xoán de Ávila, patrón do clero secular español. No marco desta xornada serán homenaxeados varios sacerdotes da diocese con motivo dos seus aniversarios de ordenación: Rvdo. Javier Martínez Prieto e Rvdo. José Rey Kochinke (25 anos); Rvdo. Alfonso Blanco Torrado, Rvdo. Alfonso Morado Paz e Rvdo. Antonio Rodríguez Basanta (50 anos); e o Rvdo. Ángel Vigo Blanco (60 anos).

Con motivo desta celebración, durante os días previos publicaranse na web diocesana www.mondonedoferrol.org e nas redes sociais entrevistas con algúns dos sacerdotes homenaxeados.

O martes 19 de maio, tamén ás 10:30 horas no Seminario de Mondoñedo, celebrarase un encontro sacerdotal que contará cun espazo de formación baixo o título “Saber envellecer”, impartido polo irmán de La Salle Antonio Botana. Trátase dunha reflexión especialmente significativa para a realidade actual do clero diocesano.

Para rematar, o xoves 21 de maio, a partir das 11:00 horas, terá lugar en Tui o encontro dos sacerdotes de Galicia, organizado con motivo dos 800 anos da dedicación da catedral. A participación coordinarase por arciprestados, e proximamente facilitarase información máis detallada sobre a organización da viaxe.