Ferrol converterase na capital da música sacra do 17 ao 30 de marzo

O alcalde de Ferrol, José Manuel Rey Varela, xunto co bispo da diocese de Mondoñedo-Ferrol, Fernando García Cadiñanos, e o director artístico do Coro Diapasón, Juan Brage, presentou o 3º Ciclo Coral de Música Sacra que se celebrará na concatedral de San Xiao os días 17, 23 e 30 de marzo, coincidindo coa Semana Santa.

A cita reunirá a agrupacións procedentes de diversos puntos da xeografía española e portuguesa entre as que se atopan o Coro Diapasón de Ferrol, organizador do ciclo. Deste xeito, o domingo 17 actuarán a Coral Lasalle, de Santiago, e Concerto Tempo de Ferrol; o sábado 23 fará o propio Los Sabandeños, de Tenerife; e pecharán o ciclo o sábado 30 a Coral de Letras Universidade de Oporto e Coro Diapasón.

O alcalde lembrou que “a música segue moi presente nas celebracións relixiosas e é un método máis de expresión, que permite crear vínculos coas diversas motivacións do ser humano, que son as que nos permiten avanzar”. Neste contexto, puxo de manifesto a importancia de dar continuidade a eventos coma este, que supoñen “o complemento perfecto para a nosa Semana Santa, para a que xa se prepara toda a cidadanía”. “Como todos sabemos, a Semana Santa é tamén un deses grandes momentos nos que a música ten un papel protagonista para sentir a paixón”, engadiu, afirmando que “este ciclo será un motivo máis de atracción de visitantes a Ferrol, que poderán gozar do gran valor histórico, artístico e espiritual que se respirará nesas datas na cidade”. O rexedor agradeceu ao Coro Diapasón o seu labor na organización deste ciclo, así como á diocese de Mondoñedo-Ferrol pola súa colaboración.

Pola súa banda, o bispo da diocese puxo en valor o carácter internacional da cita, que representa una cita cultural que, xunto aos cultos “é unha maneira de potenciar e entrar na Semana Santa, con música que eleva os nosos espíritos, fainos reposar e saír da voraxen dos días”, afirmou. Así mesmo, trasladou a súa felicitación ao Coro Diapasón pola organización do ciclo e ao Concello polo seu respaldo ao mesmo.

Brage aproveitou a rolda de prensa para avanzar que o Coro Diapasón estreará durante a súa actuación unha obra da súa autoría, e enxalzou a calidade das agrupacións que participarán nesta terceira edición.

Fonte: Concello de Ferrol