Inauguración do curso académico no Seminario Maior Interdiocesano

O pasado mes de maio anunciábase a constitución dunha comisión para poñer en marcha o Seminario Maior Interdiocesano (S.M.I.) constituído polas dioceses de Santiago de Compostela, Mondoñedo-Ferrol e Tui-Vigo. Pola súa banda, o dicasterio para o Clero aprobou no mes de agosto a erección e os estatutos do S.M.I. ‘Apóstolo Santiago’. O que era un desexo estase a converter nunha realidade.

Agora, a piques de comezar outubro, a cidade compostelá acollerá os actos oficiais co gallo da inauguración do curso académico 2024-25 no novo Seminario. Será o vindeiro luns 30 ás 12:00 horas, coa celebración dunha eucaristía na catedral de Santiago. Nela, os bispos das tres dioceses que o integran, pedirán que «o Seminario poida acoller, acompañar, discernir e axudar a formar nos seminaristas un corazón como o de Xesús Servo e Bo Pastor para servizo da nosa Igrexa en Galicia».

Pola súa banda, o acto académico de apertura de curso terá lugar na aula Magna do Instituto Teolóxico Compostelán ás 19:00 horas, coas seguintes intervencións: Roberto Martínez Díaz, secretario xeral; Anxo Carniceiro Carrera (ITC), coa lección inaugural “Homo capax Dei, homo capax communionis. A fe cristiá como existencia eclesial”; José Antonio Castro Lodeiro, director do ITC; frei Miguel da Mata Merayo, director do ISCCR; monseñor Francisco José Prieto González, arcebispo de Santiago de Compostela e moderador da Xunta Patronal do ITC, tras a cal declarará inaugurado o novo curso.

En representación da diocese de Mondoñedo-Ferrol estarán o seu bispo, monseñor Fernando García Cadiñanos; Juan Basoa Rodríguez, reitor do Seminario de Mondoñedo e formador do equipo do Seminario Maior Interdiocesano; así como os sete seminaristas, Raúl, Ismael, Gonzalo, Andrés, Renny, Sebastián e Darío, quenes estarán acompañados por varios sacerdotes nesta xornada tan especial para eles e as súas familias.

Tamén che pode interesar

Los seminaristas de nuestra diócesis comienzan el nuevo curso
As dioceses de Santiago, Tui-Vigo e Mondoñedo-Ferrol poñen en marcha un Seminario Maior Interdiocesano