A diocese apoia a mellora do ferrocarril como motor de cohesión social e territorial

• A Igrexa diocesana súmase ao Foro Cidadán polo Ferrocarril e apoia unha infraestrutura ferroviaria que vertebre o territorio e fomente o ben común
• Inspirada polos informes FOESSA, a diocese subliña que a falta de infraestruturas de transporte contribúe ao illamento e a exclusión social

A diocese de Mondoñedo-Ferrol únese ás demandas do Foro Cidadán polo Ferrocarril recentemente creado en Ferrol. Como é sabido, esta plataforma, que suscitou unha gran mobilización cidadá, pretende un tren público e sostible que axude a sacar ás comarcas de Ferrolterra, Eume e Ortegal da situación de abandono que ten que ver co ferrocarril.

Desde a diocese considérase que se trata dunha «reivindicación totalmente xusta que axuda ao desenvolvemento da comarca e que, no relativo ao tren da costa ata Ribadeo, axuda a vertebrar moito mellor o territorio diocesano«.

Igualmente, alégrase de que «a declaración institucional no Parlamento Galego suscitase a unanimidade de todos os grupos políticos, que nos axuda a volver percibir a política no seu sentido máis pleno de procura do ben común«.

Desde a diocese, e acollendo os informes FOESSA que nos axudan a acoller a realidade, «sabemos que a falta de infraestruturas e dun transporte público de calidade é un factor de illamento, exclusión e, en última instancia, un factor que contribúe ao despoboamento».

Por último, «faise un chamamento aos representantes políticos para que acollan o clamor da cidadanía e, desde o diálogo e o encontro, poñer todos os instrumentos e medios para contribuír á solución dos problemas e xerar esperanza en toda esta comarca tan necesitada».

Encontro co bispo diocesano en Ferrol

Dous representantes do Foro Cidadán polo Ferrocarril, Esperanza Piñeiro e Julia Díaz, foron recibidas na Domus Ecclesiae de Ferrol polo bispo diocesano, monseñor García Cadiñanos, quen coñeceu de primeira man as súas reivindicacións e propostas. Don Fernando, no nome da diocese, mostrou o seu apoio á iniciativa, sumándose ao respaldo que xa ofreceron distintas asociacións veciñais, culturais, educativas, deportivas e ecoloxistas, así como entidades económicas do sector empresarial, comercial e hostaleiro.

Esta reunión enmárcase dentro de encontros que o Foro Cidadán polo Ferrocarril veu mantendo nos días previos á mobilización, o vindeiro domingo 30 de novembro, co fin de reforzar a demanda social por un transporte ferroviario de calidade na comarca.