Nace Canido TV, unha canle aberta ao diálogo social, a fe e a realidade do barrio

• Impulsada pola HOAC Mondoñedo-Ferrol e Cáritas parroquial, a canle surxe para achegar a doutrina social da Igrexa á realidade do barrio e da diocese
• A programación arrinca con “Encontros na Fronteira” e incluirá novas propostas de entrevistas, voluntariado novo e coidado da creación

Canido TV botou a andar o pasado venres nos locais da parroquia ferrolá de Santa Cruz de Canido cunha aposta clara por unir fe, compromiso social e realidade cotiá. A nova canle, impulsada polo equipo diocesano da HOAC Mondoñedo-Ferrol xunto con Cáritas parroquial, nace coa vontade de achegar os valores da doutrina social da Igrexa á vida do barrio e ao conxunto da contorna diocesana.

A iniciativa preséntase como un espazo de diálogo aberto ás persoas e entidades que traballan pola construción dun mundo máis xusto, con independencia das súas crenzas ou ideas. O proxecto quere, ademais, tender pontes entre a experiencia cristiá e a realidade social, ofrecendo testemuños de vida coherente tanto dentro como fóra da Igrexa.

Segundo explican os promotores, Canido TV quere ser tamén unha ferramenta adaptada á linguaxe actual da mocidade, nun formato pensado para as redes sociais e para unha comunicación próxima, áxil e participativa. Nesa liña, a canle proxéctase como o primeiro dun conxunto de iniciativas dirixidas á xente nova, ás que se sumarán contidos sobre o coidado da creación e a ética na era da dixitalización.

Acto de inauguración

A inauguración celebrouse nun ambiente festivo e contou coas primeiras probas de entrevista a cargo de Isma, membro do equipo novo de voluntariado, que conduciu conversas con diversas persoas vinculadas á vida social, cultural e eclesial de Canido. Polos micros da canle pasaron, entre outras persoas, María Victoria González, directora de Cáritas Diocesana; Miguel, mestre do obradoiro de coiro de Cáritas Santa Cruz; Manu Pita, veciño e colaborador de Cáritas; representantes da Asociación Veciñal de Canido e da SRyD Canido; Ángel Brea, Roger de Flor e o sacerdote Alfonso Gil.

No acto estiveron tamén presentes o párroco de Canido, Antonio Rodríguez, e o sacerdote Dieudonné Abayizera, ademais de voluntariado, amizades e veciñanza, nun encontro que serviu para dar inicio a unha nova etapa no labor apostólico e comunicativo dos equipos de Canido.

«Encontros na Fronteira», serie de entrevistas

A programación arrinca co espazo “Encontros na Fronteira”, producido polo equipo da HOAC, e con un programa mensual do grupo de voluntariado novo, ao que se sumarán outras propostas en fase de definición.

A canle xa recolle contidos xerados na semana previa e durante a inauguración, incluído un vídeo de presentación publicado en YouTube, o que reforza a súa vontade de combinar testemuño local e presenza dixital.