O Seminario Interdiocesano emprende unha peregrinación a Portugal

• A experiencia enmárcase no plan formativo anual do Seminario e busca fortalecer a convivencia e a unidade eclesial
• Os bispos de Mondoñedo-Ferrol, Tui-Vigo e Santiago de Compostela participan nesta actividade de acompañamento pastoral aos seminaristas

O Seminario Interdiocesano Apóstolo Santiago realiza desde hoxe mércores e ata o vindeiro venres unha peregrinación formativa que levará aos seus seminaristas por distintos lugares de Galicia e Portugal, entre eles São Miguel do Couto, Santo Tirso —patria de san Rosendo—, Porto, Fátima e Braga.

Xunto aos dezasete seminaristas que actualmente se forman no Interdiocesano viaxarán os seus pastores: monseñor Fernando García, bispo de Mondoñedo-Ferrol e moderador do Seminario; monseñor Antonio Valín, bispo de Tui-Vigo; e monseñor Francisco Prieto, arcebispo de Santiago de Compostela.

Esta actividade enmárcase dentro do proceso formativo do curso e busca favorecer un tempo intenso de convivencia e crecemento espiritual, en comuñón cos bispos. O destino de Fátima, lugar mariano de especial significado, centra a peregrinación deste ano, que toma a vez da vivencia compartida en Roma o pasado curso.

Durante a súa estancia no santuario de Fátima, os seminaristas participarán na celebración da eucaristía na Capela das Aparicións e nos tradicionais momentos de oración comunitaria. Ademais, terán ocasión de coñecer o patrimonio histórico e artístico das cidades visitadas e de achegarse á realidade formativa do Seminario de Braga.