San Xiao, 250 anos de historia

A comisión parroquial da concatedral de San Xiao de Ferrol ven de presentar o acto central co que se conmemorarán os 250 anos do templo. O párroco, Antonio Rodríguez Basanta, trasladou hoxe aos medios diocesanos a convocatoria para o vindeiro xoves 27 de abril, que contempla unha conferencia da historiadora Margarita Sánchez e a presentación oficial da Escolanía «San Xiao». Será a partir das 19:00 horas, coa presenza do bispo da nosa diocese, monseñor Fernando García Cadiñanos.

A intervención da profesora Margarita Sánchez xirará en torno á historia do templo ferrolán, da que é unha das maiores especialistas. Cabe salientar a súa obra La concatedral de San Julián: Una iglesia de la Ilustración en la nueva población de A Magdalena (Embora, 2009), na que fai referencia a un templo construído en pleno Século das Luces no que conflúen as vontades da Igrexa, a Armada e a propia cidade de Ferrol. Sánchez é membro do consello de redacción do anuario diocesano «Estudios Mindonienses» desde 1985 e destaca, entre as súas moitas investigacións, varios volumes adicados a historia do concello de San Sadurniño. A presentación da conferencia faraa o sacerdote Ramón Otero Couso, párroco da concatedral durante vintecinco anos e antigo director do anuario da diocese.

Pola súa banda, a Escolanía «San Xiao» é unha agrupación para voces de nenos e nenas con formación musical específica, de entre nove e dezasete anos, dirixida pola soprano Sofía Rodríguez. Xorde co único requisito de ter ganas de cantar e de aprender, e non substitúe, senón que complementa, segundo a súa directora, aos actuais coros parroquiais. Continúa aberta a inscrición para integrarse na formación, da que xa forman parte unha decena de nenas e nenos.

O acto rematará cunha pequena sorpresa: a presentación oficial dun recordo institucional relacionado co templo.

Actos 250º aniversario San Xiao Ferrol (2023)