Sete sacerdotes diocesanos serán homenaxeados na festa de San Xoán de Ávila

Segundo informa a delegación diocesana do Clero a través da súa canle de información, o venres 10 de maio terán lugar no Seminario de Mondoñedo os actos celebrativos da festa de San Xoán de Ávila, mestre de santos e doutor da Igrexa, padroeiro do clero secular español. Nesa xornada, presidida polo bispo da diocese, rendirase homenaxe a varios sacerdotes que celebran neste 2024 as súas vodas sacerdotais. Serán os seguintes:

· Vodas de Diamante (60 anos): Rvdo. Manuel Cabana Fernández (ordenado en Mondoñedo en 1964).

· Vodas de Ouro (50 anos):  Rvdo. José Manuel Quintana Amado (ordenado en Piñeiro no 1974), o Rvdo. Xosé Antón Miguélez Díaz (ordenado en Pedrafita, Chantada, no 1974) e o P. Manuel Díez Borges, CMF (ordenado en Salamanca en 1974).

· Vodas de Prata (25 anos): Rvdo. José Pascual Duque Ochoa (ordenado en San Cristóbal, Venezuela, en 1999), o Rvdo. Xoán Xosé Fernández Fernández (ordenado en Mondoñedo en 1999) e o Rvdo. Óscar Santiago Sanmartín (ordenado en Mondoñedo en 1999).

En canto a outras datas relevantes relativas á delegación, o martes 23 de abril, tamén no Seminario de Mondoñedo, dentro do ciclo mensual de formación permanente, que neste mes alcanza a sétima convocatoria, desenvolverase unha conferencia centrada no canto na liturxia. Estará dirixida pola soprano Sofía Rodríguez Fernández, graduada superior en viola e canto, profesora de música e directora da escolanía da concatedral de San Xiao de Ferrol.

O 19 de xuño está prevista a peregrinación dos sacerdotes de Galicia ordenados nos últimos 25 anos ao santuario da Virxe do Corpiño (Lalín), con motivo do Ano Xubilar. E o día 11 de xuño, martes, haberá unha excursión a Santiago de Compostela, onde os sacerdotes diocesanos visitarán a exposición do tesouro artístico do Terra Sancta Museum de Jerusalén, no Gaiás. Está organizada desde os catro arciprestados e dela informarase con antelación.