Unha eucaristía en Ferrol lembrará ás vítimas dos accidentes de tráfico

• A celebración enmárcase no Día Mundial en Recordo das Vítimas de Accidentes de Tráfico, e terá lugar o vindeiro 14 de novembro na concatedral de San Xiao

A Diocese de Mondoñedo-Ferrol sumarase este ano á conmemoración do Día Mundial en Recordo das Vítimas de Accidentes de Tráfico. Con este motivo, a Delegación de Pastoral da Carretera organiza unha eucaristía especial que se celebrará o sábado 14 de novembro, a las 19:00 horas, na concatedral de San Xiao de Ferrol. A celebración estará presidida polo bispo diocesano, monseñor Fernando García Cadiñanos.

Desde a delegación diocesana invítase de xeito especial a participar nesta eucaristía aos familiares das vítimas mortais e dos feridos nas estradas, así como ás asociacións de vítimas, aos colectivos do sector do transporte, aos condutores e ás autoridades vinculadas á seguridade viaria. A invitación faise extensiva tamén aos membros dos servizos de emerxencia —bombeiros, persoal sanitario e forzas e corpos de seguridade—, cuxa labor de auxilio e rescate resulta fundamental neste ámbito.

Con esta misa, a diocese pretende ofrecer un espazo de oración e consolo cristián a quen perdeu a seres queridos. Ao mesmo tempo, únese ao chamamento global para concienciar sobre a dor humana e as consecuencias sociais das traxedias viarias, así como sobre a necesidade de fomentar condutas responsables ao volante.

O Día Mundial en Recordo das Vítimas de Accidentes de Tráfico celébrase o terceiro domingo de novembro. Foi proclamado pola Asemblea Xeral das Nacións Unidas o 26 de outubro de 2005. A xornada foi promovida inicialmente en 1993 pola organización RoadPeace e contou posteriormente co respaldo da Federación Europea de Vítimas de Tráfico e da Organización Mundial da Saúde (OMS). O seu obxectivo é honrar a memoria das persoas falecidas e lembrar a urxencia de reducir a sinistralidade nas estradas.

Ata o momento, no que vai de ano, rexistráronse 902 falecidos nas estradas españolas en 830 accidentes mortais. En Galicia, as vítimas ascenden a 76, en 69 sinistros mortais.