Xosé Francisco Delgado: «Ver chegar a Ferrol Vello tantos peregrinos para facer o Camiño Inglés é algo moi emocionante»

Entrevista ao párroco da Nosa Señora do Socorro, na UPA de Ferrol-Centro

«aAmaioría dos peregrinos que comezan a súa peregrinación en Ferrol Vello, cando visitan o primeiro templo do Camiño Inglés, entran na concatedral de San Xiao, onde si vemos o constante crecemento do fenómeno xacobeo»

11 xullo 2022.- Cada vez que lembra que naceu en 1956, Xosé Francisco Delgado, dono dun extraordinario sentido do humor e home sempre afable, lembra que ese foi «o ano dunha gran colleita, no que naceron moitos artistas, desde Mel Gibson e Miguel Bosé ata Andy García e Imanol Arias». Sempre vinculado a Ferrol Vello —é o párroco do Socorro—, segue alzando a voz en defensa dun barrio que, como el mesmo sinala, «está cheo de potencialidades, e debería ter un gran futuro».

Que lle parecen as medidas que se veñen poñendo en marcha, nos últimos anos, para revitalizar o barrio?

Paréceme que hai que seguir avanzando. Porque Ferrol Vello está como todo o mundo pode ver que está, a pesar de que se atopa nun lugar excepcional. Hai que actuar dun xeito decidido, apoiando de verdade a recuperación do barrio, e ademais actuar con criterio.

E cando fala de actuar con criterio, a que se refire?

Falo de que Ferrol Vello é un barrio que ten unha gran historia, unha historia que afunde as súas raíces na Idade Media, e de que ademais posúe a súa propia identidade, unha identidade mariñeira moi marcada. E a min paréceme que iso é algo que hai que ter en conta á hora de ir avanzado de cara a unha verdadeira rehabilitación. Hai que respectar a alma de Ferrol Vello e axudar a que este barrio, un barrio habitado por unha xente marabillosa, volva ser o que foi. Hai que saber preservar o espírito dos lugares que teñen unha fonda raíz mariñeira. Lugares que sempre estiveron moi unidos ao mar.

«A peregrinación é un fenómeno que, felizmente, vai, de novo, a máis —di Xosé Francisco Delgado—. Ver chegar a Ferrol Vello tantos peregrinos para facer o Camiño Inglés é algo moi emocionante».

Coincide iso, ademais, co feito de que a imaxe do Cristo dos Navegantes xa está restaurada…

Si, pero claro: a igrexa do Socorro non a podemos ter aberta todo o día, porque son moitas as cousas que hai que atender, e os sacerdotes que desempeñamos o noso labor no casco histórico de Ferrol non podemos estar pendentes dun só templo. Por iso a maioría dos peregrinos que comezan a súa peregrinación en Ferrol Vello, cando visitan o primeiro templo do Camiño Inglés, entran na concatedral de San Xiao, onde si vemos o constante crecemento do fenómeno xacobeo.

En calquera caso, a devoción ao Cristo dos Navegantes segue estando moi viva…

Si, pero non tanto como nós quereriamos.

A que se refire, exactamente?

A que tanto o Cristo dos Navegantes como incluso a nosa Virxe, a Virxe do Socorro [á que popularmente se coñecía como A Parrocheira, porque as parrocheiras de Ferrol Vello, as súas grandes devotas, tiñan o costume de levarlle como ofrenda os primeiros cartiños que cobraban na súa vida], seguen tendo o afecto da xente do mar e de moitas persoas maiores pero entre os novos xa non é tanto así. E nós queremos revitalizar esa devoción.

Entrevista publicada na edición dixital de La Voz de Galicia
Texto: Ramón Loureiro/Fotografía: José Pardo

Artículos relacionados

Síguenos

5,484FansMe gusta
4,519SeguidoresSeguir
1,230SuscriptoresSuscribirte

Últimas publicaciones

Etiquetas