25 anos de camiño compartido das relixiosas do Divino Celo en Burela

• A xornada puxo en valor a pegada da comunidade na vila e renovou o compromiso coa súa misión de servizo, proximidade e anuncio do Evanxeo

A comunidade das Hijas del Divino Celo-Rogacionistas de Burela celebrou o pasado 12 de setembro o seu 25º aniversario de presenza e misión na localidade. A xornada reuniu a membros da vida consagrada, sacerdotes, representantes da sociedade civil, do ámbito social e da comunidade eclesial, así como familiares, amizades, colaboradores e numerosas persoas que, ao longo deste cuarto de século, formaron parte da historia e da misión das relixiosas.

Memoria dunha presenza ao servizo

O primeiro momento da xornada estivo dedicado á presentación dun documental sobre os vintecinco anos de presenza da comunidade en Burela. A través de imaxes, recordos e testemuños, a peza permitiu revisar as diferentes etapas dun camiño marcado pola entrega, o servizo e a proximidade ás persoas. A proxección completouse coas intervencións de distintas persoas pertencentes ao ámbito social, á sociedade civil e á comunidade eclesial.

A eucaristía, corazón da celebración

A eucaristía de acción de grazas constituíu o centro da xornada. Foi presidida por monseñor Fernando García Cadiñanos, bispo de Mondoñedo-Ferrol, e por monseñor Manuel Sánchez Monge (bispo diocesano entre 2005 e 2015), e concelebrada por un nutrido grupo de sacerdotes.

 

Ver esta publicación en Instagram

 

Una publicación compartida de Hijas Divino Celo – Obra Social (@hijasdivinocelo)

A presenza dos dous bispos e dos presbíteros expresou de maneira visible a comuñón entre a vida consagrada e a Igrexa diocesana, así como a proximidade da comunidade cristiá ás Hijas del Divino Celo nesta data tan significativa.

Durante a celebración, na que participaron relixiosas e relixiosos de diferentes comunidades, familiares, amizades, colaboradores e fieis, púxose ante o altar a historia destes vintecinco anos: os momentos de alegría e dificultade, os proxectos desenvolvidos, o servizo prestado e a fidelidade de Deus que sostivo o camiño da comunidade. A eucaristía foi tamén unha acción de grazas polo don da vocación consagrada e polo carisma do Divino Celo, vivido e compartido polas irmás na súa presenza en Burela.

Un aniversario que mira ao futuro

Desde a CONFER Mondoñedo-Ferrol expresouse o agradecemento a Deus polos vintecinco anos de presenza, entrega e misión das Hijas del Divino Celo en Burela. O seu responsable, o padre Ángel Elako, destacou o testemuño e o servizo ofrecidos pola comunidade ao longo deste tempo, así como o ben sementado na localidade a través da súa presenza.

Fonte: Diocese/CONFER Mondoñedo-Ferrol