31ª Xornadas do Clero de Galicia: «Por unha Igrexa máis sinodal e con esperanza»

• Celebraranse, do 10 ao 12 de setembro, no mosteiro de Poio (Pontevedra)

Do 10 ao 12 de setembro celebraranse no mosteiro pontevedrés de Poio as XXXI Xornadas Sacerdotais das cinco dioceses de Galicia. Nesta ocasión, o lema que congregará aos presbíteros de todas as dioceses é «Por unha Igrexa máis sinodal e con esperanza».

Durante tres días compartiranse momentos de reflexión e de oración, ademais de convivencia e lecer. Organizado polas delegacións do Clero das cinco dioceses, entre os relatores destacan monseñor Luis Marín de San Martín, subsecretario do Dicasterio para o Sínodo; monseñor Jesús Vidal Chamorro, vicepresidente da comisión episcopal para o Clero e os Seminarios; Eva Fernández Mateo, presidenta nacional de Acción Católica Xeral; e monseñor Francisco J. Prieto Fernández, arcebispo de Santiago de Compostela.

Da nosa diocese intervirá o sacerdote Antonio Rúa, cun relatorio sobre relixiosidade popular.

En palabras do delegado diocesano do Clero, Antonio Rodríguez Basanta, as de 2025 serán unhas xornadas “que nos axudarán a situarnos no novo curso e que permitirán afrontar temas de actualidade desde unha perspectiva sacerdotal”.