A Igrexa galega celebra o Triduo Pascual xunto aos presos e presas de Teixeiro

• Monseñor García Cadiñanos e monseñor Francisco José Prieto acompañaron á Pastoral Penitenciaria nas emotivas celebracións da Cea do Señor e do viacrucis

O Santo Triduo Pascual converteuse nunha profunda experiencia existencial no Centro Penitenciario de Teixeiro. Durante o Xoves e o Venres Santos, internos e internas compartiron coa Igrexa o recordo vivo do Prendemento, Paixón e Morte do Señor. Onde humanamente todo parece noite, Deus manifesta a súa luz e esperanza.

A Misa da Cea do Señor, celebrada o Xoves Santo, foi presidida por monseñor Fernando García Cadiñanos, bispo de Mondoñedo-Ferrol, acompañado por voluntarios e responsables da Pastoral Penitenciaria e Cáritas. O salón de actos acolleu uns oficios austeros e intensos, marcados polo emblemático lavatorio dos pés.

Onte, Venres Santo, o arcebispo de Santiago, monseñor Francisco José Prieto, presidiu a oración do viacrucis, con meditacións elaboradas por presos de Soto del Real. Máis dun centenar de internos participaron activamente nun acto de gran emotividade, seguido dun encontro persoal. A xornada concluíu coa visita á Unidade Terapéutica Educativa (UTE), onde o arcebispo compartiu tempo cos internos e internas da comunidade. Os participantes agasallaron a monseñor Prieto con recordos elaborados nos obradoiros educativos e interpretaron, da man de Alejandro, cantautor, o himno da UTE, que expresa a loita contra as adiccións.

A Pastoral Penitenciaria galega vive así o Triduo Pascual como tempo de encontro, esperanza e renovación da fe, especialmente entre aqueles que buscan a luz de Deus no medio da súa propia noite.