A Valedora insta a Sanidade a atender a menores extranxeiros tras a queixa de Cáritas Diocesana

Cáritas de Mondoñedo-Ferrol interpuxo unha queixa ante a Valedora do Pobo contra a Xefatura Territorial da Consellería de Sanidade de A Coruña, ao constatar dende os seus servizos de acollida e acompañamento a negación sistemática da expedición da Tarxeta Sanitaria a menores estranxeiros que viven en Galicia cando levan menos de tres meses (90 días), ao ser considerada “estancia” e non “residencia”. A queixa refírese, especialmente, a menores en situación de vulnerabilidade a quen se lles nega a asistencia sanitaria ao longo dese tempo, ao abeiro da interpretación da Lei 16/2003 do 28 de maio de cohesión e calidade do Sistema Nacional de Saúde, segundo redacción dada este polo Real Decreto-lei 7/2018, do 27 de xullo, sobre o acceso universal ao Sistema Nacional de Saúde.

Cáritas alegou que dito Real Decreto garante a universalidade da asistencia, é dicir, a garantir o dereito á protección da saúde e á atención sanitaria, nas mesmas condicións, a todas as persoas que se atopen no Estado español, independentemente do tempo que leven, e de xeito especial si se atopan en situación de vulnerabilidade.
Segundo a Valedora do Pobo, “no que atinxe ao expediente de queixa presentado por Cáritas, non estamos diante de situacións que comprometan o sistema nin que se faga mal uso do mesmo, senón ante unha posible negación de asistencia sanitaria a persoas en situación vulnerable, especialmente mulleres e nenos, que non poden acreditar atoparse en España dende hai mais de 90 días, pero que si se atopan en condicións sociais precarias e sen recursos para facer fronte aos gastos sanitarios que precisan (procesos de embarazo e outros)”.

Cáritas de Mondoñedo-Ferrol acompaña anualmente a máis de 4000 persoas ao acceso os seus dereitos, dos que o 45% son persoas migrantes e algo mais do 25% son menores de idade. “Esta valoración da Valedora do Pobo constitúe un gran paso para instar as administracións, e neste caso, a Consellería de Sanidade, que actúe como garante de dereitos de todas as persoas”, señala Marta Pazo Paniagua, secretaria xeral de Cáritas de Mondoñedo-Ferrol.

Fonte: Cáritas Mondoñedo-Ferrol