A Xunta renova o convenio coas dioceses galegas para intervencións en igrexas parroquiais

O Consello da Xunta deu luz verde á renovación do convenio de colaboración entre a Xunta de Galicia e as dioceses galegas para contribuír a pequenas actuacións de conservación e mantemento de 16 igrexas parroquiais que forman parte do patrimonio cultural de Galicia. Así, o acordo contempla este ano unha achega de 600.000 euros para realizar distintas intervencións de protección e rehabilitación nestes bens ao longo do ano.

Achegas aos templos diocesanos de Dores (Ferrol), Quende e Portocelo

Ao abeiro deste convenio, se achegarán 94.800 euros á nosa diocese de Mondoñedo-Ferrol, que permitirán mellorar as condicións da igrexa de Nosa Señora das Dores, en Ferrol, con traballos de limpeza e consolidación das súas torres, e renovar as cubertas de Santiago de Quende, en Abadín, e da igrexa de San Tirso de Portocelo, en Xove.

Colaboración estable

O convenio renovado forma parte do compromiso do Goberno galego coa preservación do patrimonio cultural de todo o territorio e enmárcase na colaboración estable que a Consellería de Cultura, Lingua e Xuventude mantén coas dioceses galegas para a posta en valor dos seus bens máis senlleiros.

Cómpre destacar que moitos dos bens culturais da Igrexa están incorporados á lista do patrimonio mundial ao estar vencellados ao Camiño Francés e aos Camiños do Norte, ademais de contar con grandes mosteiros, abadías, conventos, conxuntos catedralicios e diferentes monumentos declarados Ben de Interese Cultural.

Fonte: Xunta de Galicia

Ao abeiro deste convenio coa @Xunta, se achegarán 94.800 € á diocese @mondonedoferrol

? Mellora da igrexa de Dores, en #Ferrol, con traballos de limpeza e consolidación das súas torres

? Renovación das cubertas de #Quende (Abadín) e da igrexa de #Portocelo (Xove) https://t.co/qLssWvnxN8

— Diócesis de Mondoñedo-Ferrol (@mondonedoferrol) July 1, 2025