Comunicado oficial ante a profanación do sagrario da igrexa de Guitiriz

• Tras o roubo e a profanación do sagrario da igrexa, o bispo Fernando García presidirá o martes 29 unha eucaristía de desagravio

Descoñecidos entraron o pasado sábado ao mediodía na igrexa parroquial do Sagrado Corazón de María de Guitiriz e cometeron unha profanación do sagrario. Os autores arrincaron o sagrario do seu lugar, forzaron a pechadura e abriron o recipiente, do que extraeron o copón. As hostias consagradas foron espalladas na praza do pobo, mentres que o copón de prata foi subtraído.

A Diocese de Mondoñedo‑Ferrol cualifica o suceso como un «gravísimo acto» que constitúe unha afrenta directa á eucaristía, centro da fe e da vida da Igrexa. Ante esta situación, a diocese, co bispo á fronte, expresa a súa «máis enérxica condena» por unha profanación que «fire profundamente os sentimentos relixiosos dos católicos e de toda a comunidade parroquial de Guitiriz» e que atenta directamente contra o dereito á liberdade relixiosa.

Segundo a doutrina católica, este feito representa unha grave ofensa ao Señor Sacramentado, presente na eucaristía, e afecta á fe do pobo de Deus. Os feitos foron denunciados ante as autoridades competentes, que abriron unha investigación para identificar aos responsables.

Como resposta pastoral, o bispo diocesano, monseñor Fernando García Cadiñanos, invitou a comunidade cristiá de Guitiriz e a quen o desexe a sumarse á oración e a participar nos actos de reparación. A eucaristía de reparación celebrarase o martes 29 de setembro, ás 20:00 horas, na igrexa do Sagrado Corazón de María, coa presenza do bispo.