Faleceu o sacerdote diocesano Ricardo Díaz Seijas

Monseñor Fernando García Cadiñanos oficiará esta tarde en Ribadeo o funeral de corpo presente

10 febreiro 2022.- Don Ricardo Díaz Seijas naceu en Cárdenas (Matanzas-Cuba) o 8 de setembro de 1927, aínda que as súas raíces familiares son da parroquia de Pino (Cospeito). Era o sacerdote máis lonxevo da nosa diocese.

Fixo os seus estudios de latín e humanidades, filosofía e teoloxía no Seminario de Mondoñedo e foi ordenado sacerdote polo bispo don Mariano Vega Mestre o 3 de abril de 1954.

Inmediatamente foi nomeado cuadxutor de Santiago de Foz e capelán do Colexio dos Irmáns Menesianos da mesma localidade, ata o ano 1957.

Foi nese ano pasou a ser cura ecónomo de Xuances e encargado temporalmente de Portocelo no concello de Xove. E no ano 1963 encargado tamén de Celeiro e Faro.

Desde setembro de 1963 ata o ano 1966 foi nomeado polo bispo Argaya vicereitor do Seminario de Lourenzá e encargado da parroquia de Fórnea (Trabada).

Desde a ano 1966 ata o 1977 cura ecónomo de San Miguel de Reinante e encargado de Santiago de Reinante.

Nese último ano pasou a ser cura ecónomo e logo párroco de Ribadeo ata a súa xubilación. Foi tamén arcipreste de Ribadeo (1972-1983), encargado da parroquia de Ove e capelán do Hospital-Asilo.

Unha vez xubilado seguiu residindo en Ribadeo, realizando algúns servizos pastorais mentres puido, sempre acompañado e coidado pola súa irmá Carmiña e a familia da casa.

De don Ricardo hai que ponderar o seu servizo entregado ás parroquias polas que pasou. De carácter tímido, cunha presenza sempre discreta pero afectuoso e bo compañeiro, respectado e querido.

Despois de noventa e catro de vida, descansa na paz do Señor.
 

Funeral: Hoxe xoves 10, ás 16:00 horas, na igrexa parroquial de Santa María do Campo de Ribadeo. Estará presidido polo bispo de Mondoñedo-Ferrol, monseñor Fernando García Cadiñanos.

O sábado ás doce do mediodía haberá unha misa para recordalo na igrexa parroquial de San Martiño de Pino, en Cospeito.