‘Habla la Diócesis’ (30.05.2021): Pro orantibus + Ensino relixioso + Semana da Caridade

Intervención semanal do administrador diocesano, Antonio Valín, a través da Cadena COPE

· DOMINGO DA SANTÍSIMA TRINDADE: Neste domingo celebramos o misterio da Santísima Trindade, o misterio central da fe e da vida cristiá. Só Deus pode dárnolo a coñecer revelándose como Pai, Fillo e Espírito Santo: «Un só Deus, tres Persoas distintas, de única natureza e iguais en dignidade». No seu nome fomos bautizados. «Pola graza do bautismo, no nome do Pai e do Fillo e do Espírito Santo, somos chamados a participar na vida da Bienaventurada Trindade, aquí abaixo na escuridade da fe e, despois da morte, na luz eterna». Na misa somos convidados á mesa da Trindade onde o Pai, por obra do Espírito Santo, continúa dándonos ao seu Fillo, o pan de vida eterna.

· Celebramos hoxe o misterio da Santísima Trindade, un día no que tamén nos lembramos das nosas comunidades contemplativas, co gallo da Xornada Pro Orantibus. Este ano, o lema é «A vida contemplativa, preto de Deus e da dor do mundo».

· No día de hoxe tamén celebramos a Xornada do Ensino Relixioso Escolar, unha cuestión sempre polémica e que sempre está na palestra cando hai cambios de Goberno ou cando se idean reformas nas leis de educación.

· Deixamos o día de hoxe e centrámonos nunha semana intensa que comeza a partir de mañá: a Semana da Caridade. Por suposto, un dos puntos centrais da vindeira semana é o domingo, solemnidade do Corpus Christi. Nesa xornada, aparte doutros actos diocesanos, temos en Foz a presentación do novo disco de Tere Nécega e Salomé Arricibita, “Dime cómo ser pan”. Trátase dun álbum que ten como fío conductor o ideario de Cáritas, cuestións como amar ao próximo, dar de comer ao famento ou ser a sal e o pan de vida que precisa o mundo.

· A nivel da Igrexa universal tamén temos que falar da Semana Laudato Si, que finalizaba o pasado martes 25 cunha novidade importante: a creación dunha plataforma para promover a “ecoloxía integral” e o fomento de novos estilos de vida.

«A vida contemplativa é o pulmón da nosa Igrexa»