Lugo acolle a Ofrenda do Reino de Galicia, tradición ininterrompida desde hai máis de tres séculos

• A cerimonia ante o Santísimo Sacramento expresa a vontade histórica de unidade e representación do conxunto de Galicia

A catedral de Lugo acollerá este domingo, 14 de xuño, ás 11:00 horas, a celebración da Ofrenda do Reino de Galicia ao Santísimo Sacramento, unha das tradicións máis singulares do patrimonio relixioso, histórico e institucional galego.

A edición deste ano permite salientar dous aspectos especialmente relevantes desta tradición secular: por unha banda, a documentación histórica conservada acredita a continuidade da Ofrenda durante máis de tres séculos, confirmando que a cerimonia se mantivo viva xeración tras xeración ata a actualidade. Non se trata, polo tanto, dunha práctica recuperada tras períodos de interrupción, senón dunha celebración que nunca deixou de formar parte da vida relixiosa e institucional de Galicia. Por outra banda, a evolución histórica da cerimonia pon de manifesto a importancia do acordo adoptado en 1926, polo que se estableceu o sistema rotatorio de presentación da Ofrenda entre as sete cidades históricas galegas. Esta decisión expresa a vontade de participación conxunta de toda Galicia nunha celebración considerada patrimonio común, garantindo a presenza periódica das distintas cidades en Lugo.

A Ofrenda constitúe unha expresión singular da vinculación histórica de Galicia co Santísimo Sacramento. Desde hai séculos, as sete cidades do antigo Reino de Galicia acoden á catedral de Lugo para realizar esta ofrenda en nome de toda a comunidade galega.

Neste ano, a representación do antigo Reino de Galicia corresponderalle á cidade de Tui. A Ofrenda será presentada polo seu alcalde, Enrique Cabaleiro González, e recibida por monseñor Antonio Valín Valdés, bispo de Tui-Vigo. A dimensión popular da celebración volverá facerse patente nesta edición. Xunto á representación institucional, a cidade de Tui desprazarase a Lugo con tres autobuses nos que viaxarán membros da corporación municipal, integrantes da Asociación Traxe Tradicional de Tui e numerosos veciños que desexan participar nunha cerimonia que forma parte do patrimonio común de Galicia.

A celebración contará ademais coa participación de diversas asociacións culturais vinculadas á conservación e difusión das tradicións galegas. Á presenza habitual de Os Xílgaros de Lugo, encargados do acompañamento musical en distintos momentos do acto, sumarase este ano o grupo etnográfico Traxandaina, cuxos integrantes acudirán vestidos con indumentaria tradicional de distintas comarcas da provincia de Lugo, visibilizando así o patrimonio cultural asociado a unha das cerimonias máis emblemáticas de Galicia.

En representación da nosa diocese estará o bispo monseñor Fernando García Cadiñanos.

Máis aló do seu valor histórico, a continuidade desta tradición pon de relevo a capacidade dun pobo para conservar e transmitir ao longo do tempo aquilo que considera esencial.

Fonte: Diocese de Lugo