Nota dos bispos de Galicia ante a solemnidade de San Xosé

Os prelados acordan manter nas dioceses respectivas o carácter festivo deste día

14 marzo 2022.- Acabamos de celebrar un Ano dedicado a San Xosé con motivo da conmemoración dos 150 anos do decreto Quemadmodum Deus, co cal o beato Pío IX declarou a san Xosé patrón da Igrexa universal. Na súa carta apostólica Patris Corde, o papa Francisco propoñíanos a san Xosé como “un pai na tenrura, na obediencia e a acollida”, e convidábanos a buscar en “San Xosé -o home que pasa desapercibido, o home da presenza diaria, discreta e oculta- un intercesor, un apoio unha guía en tempos de dificultade”.

A Igrexa venérao con especial honra como patrón, a quen o Señor constituíu sobre a súa familia. A persoa e a vida de san Xosé teñen na historia da nosa salvación unha importancia que foi recoñecida sempre pola sagrada liturxia e as leis canónicas ao propoñer a súa festa como día de precepto (cf. canon 1246). Tradicionalmente o pobo cristián secundou esta norma dando un significativo realce familiar e social á festa do 19 de marzo.

Neste ano de 2022, este día foi declarado laborable na comunidade autónoma de Galicia. Ante a necesidade de fixar claramente o tratamento que dita festa debe ter por parte da comunidade católica, os bispos da provincia eclesiástica de Santiago acordamos manter nas dioceses respectivas o carácter festivo deste día.

En consecuencia, e para coñecemento dos fieis, dispoñemos:

1. Manter o 19 de marzo, solemnidade de San Xosé, festa de precepto, coa obrigación de participar na Santa Misa, aínda que sexa laboralmente hábil. Con todo, téñase en conta que, segundo o establecido no calendario litúrxico-pastoral da Conferencia Episcopal, a solemnidade chega soamente ata a hora nona do sábado 19 xa que, despois, comezan as I vésperas do domingo III de Coresma.

2. Aqueles fieis que teñan xornada laboral ordinaria quedan dispensados do precepto, aínda que se lles pide e recomenda vivamente a participación na eucaristía dese día de festa dedicado a San Xosé, esposo da Virxe.

3. Seguindo o calendario litúrxico-pastoral da Conferencia Episcopal Española, a solemnidade de San José comezará a celebrarse na tarde do venres, día 18 de marzo. Para a misa vespertina do día 19 de marzo utilizarase o formulario do domingo III de Coresma.

4. Pedir, igualmente, aos párrocos e reitores de igrexas que informen os fieis con antelación destas decisións e acomoden no posible os horarios de misas ás posibilidades e necesidades dos fieis.

5. Ao coincidir a celebración do Día do Seminario coa festividade de San Xosé, a oración e a colecta para o Seminario diocesano serán trasladadas á tarde do sábado, día 19, e ao domingo, día 20 de marzo.

+ Julián, Arcebispo de Santiago
+ Luis, Bispo de Tui-Vigo
+ Alfonso, Bispo de Lugo
+ José Leonardo, Bispo de Ourense
+ Fernando, Bispo de Mondoñedo-Ferrol
+ Francisco José, Bispo Auxiliar de Santiago

 

Artículos relacionados

Síguenos

5,484FansMe gusta
4,523SeguidoresSeguir
1,230SuscriptoresSuscribirte

Últimas publicaciones

Etiquetas