Novas orientacións diocesanas para a institución dos ministerios laicais

• O documento, froito dun proceso sinodal de elaboración, apoiase na experiencia dos dous últimos cursos e busca fortalecer a corresponsabilidade bautismal

A Diocese de Mondoñedo-Ferrol aprobou as novas Orientacións sobre a Institución dos Ministerios de Lector, Acólito e Catequista, mediante un edicto datado o pasado 29 de xuño e asinado polo bispo, monseñor Fernando García Cadiñanos. O documento culmina un proceso de elaboración sinodal no que participaron o Consello Episcopal, o Consello Presbiteral e o Consello de Pastoral diocesanos, que deu a súa aprobación na última sesión celebrada en xuño.

O texto parte das directrices da Igrexa universal e dos documentos da Conferencia Episcopal Española, pero está pensado para responder á realidade concreta da Igrexa diocesana. Para iso, incorpora tamén a experiencia acumulada durante os dous últimos cursos, nos que se traballou cos primeiros candidatos propostos polas parroquias.

Estas orientacións nacen co propósito de promover, formar e acompañar aos laicos que desexan asumir de xeito estable un servizo na misión evanxelizadora. Non se conciben como unha resposta conxuntural á falta de clero, senón como unha expresión da dignidade e a corresponsabilidade que brotan do bautismo.

O documento quere ofrecer un marco público e claro para a promoción, a formación e o envío de quen reciba estes ministerios laicais. Na práctica, isto supón reforzar a participación dos laicos na vida das comunidades, favorecer unha maior dinámica pastoral e consolidar equipos misioneiros con espírito sinodal.

En palabras do bispo diocesano, “é un camiño do Espírito que temos que seguir acompañando, coidando e fomentando para ben da nosa Igrexa e para mirar o futuro con esperanza”.

Requisitos e proceso

O texto regula os tres ministerios laicais aprobados pola Igrexa —lector, acólito e catequista— e sinala catro trazos comúns: a súa raíz bautismal, a súa estabilidade, o recoñecemento público de la Iglesia e o mandato do bispo.

Para acceder a eles, os candidatos, homes e mulleres, deben reunir unha serie de condicións. Entre elas figuran ter entre 30 e 70 anos, completar a iniciación cristiá, acharse en situación canónica regular e contar con experiencia previa recoñecida na súa comunidade. Ademais, será necesario un informe escrito e o aval do párroco que acredite a súa idoneidade pastoral.

O itinerario previsto articúlase en varias fases. A primeira é a presentación da solicitude, que debe ir acompañada do informe parroquial e ser admitida polo bispo. Despois desenvólvese un período de formación discipular de, polo menos, dous cursos, con contidos humanos, intelectuais, espirituais e pastorais. Este proceso formativo xa se levou durante os dous últimos anos.

A etapa final será a institución e o envío litúrxico, presididos polo bispo, nos que se confire o ministerio e se encomenda o seu servizo a unha parroquia ou a unha UPA concreta. A iso súmase unha formación permanente, xa que o exercicio destes ministerios esixe actualización e acompañamento continuos, aínda que non teña carácter vitalicio.

Funcións de cada ministerio

O documento tamén precisa as funcións propias de cada ministerio, algunhas delas compartidas. Os lectores proclaman a Palabra na liturxia, coa excepción do Evanxeo, e poden animar escolas bíblicas, grupos de Lectio Divina ou celebracións dominicais en espera de presbítero.

Os acólitos asisten ao sacerdote e ao diácono na misa, poden distribuír a comuñón como ministros extraordinarios, coordinar aos monaguillos e expoñer o Santísimo para a adoración, sen impartir a bendición. Tamén poden presidir celebracións da Palabra.

Pola súa banda, os catequistas asumen a animación e coordinación da catequese nas súas distintas formas, desde a iniciación cristiá ata a formación permanente e a pastoral familiar. Ademais, colaboran na formación doutros axentes de pastoral e desempeñan unha función de coordinación na vida comunitaria.

Proxección diocesana

Coa aprobación destas orientacións, a diocese quere ofrecer un marco de referencia para os futuros candidatos e consolidar unha liña de traballo que xa comezou a dar froito nestes dous últimos anos. O obxectivo é que as UPA conten con persoas instituidas que poidan colaborar co ministerio ordenado na organización e animación das comunidades.

Quen desexe ampliar información pode poñerse en contacto co vigairo para a Sinodalidade, coordinador desta acción pastoral, a través do correo electrónico vic.sinodalidad@mondonedoferrol.org.

DESCARGA Orientacións sobre a Institución dos Ministerios de Lector, Acólito e Catequista (2026) (PDF)