Os retos da Pastoral Familiar, a debate en Poio

As delegacións de Familia das dioceses galegas organizan o 4º Encontro de Axentes de Pastoral Familiar de Galicia, dirixido a aqueles matrimonios, sacerdotes, relixiosos e laicos que traballen con matrimonios e familias ou estean interesados en facelo.

O encontro celebrarase os días 19 e 20 de outubro no hospedaxe do mosteiro de Poio (Pontevedra). A acollida terá lugar o sábado 19 de 9:30 a 10:00 horas, para rematar o domingo tras o xantar. Dase a posibilidade de participar soamente na xornada do sábado, para o que é necesario contactar previamente coa delegación.

O programa

Co lema “Retos da Pastoral Familiar hoxe”, Fernando Vidal (doutor en Socioloxía e profesor da Universidade Pontificia Comillas, onde dirixe o Instituto Universitario da Familia) tratará de abrir portas e mostrar ferramentas que faciliten o traballo cos matrimonios e familias das nosas dioceses.

«No noso Plan Pastoral Diocesano«, sinala Mar Sarmentero, delegada diocesana de Laicos, Familia e Vida, «no punto 3.3. exponse o reto de atender especialmente á xuventude, matrimonios e familias, que se recolle da seguinte maneira: “E é que no proceso sinodal que estamos a vivir insístese, de forma practicamente unánime, na prioridade que debemos dar á mocidade e á familia (AL 200-204; ChV 206-207), pois é xustamente nestas pastorais sectoriais onde se pon en xogo o futuro das nosas comunidades. Por iso temos que adicar máis tempo, máis recursos, máis imaxinación e máis iniciativas a esta tarefa (ChV 209)…”. Por iso, convidámosvos a que participedes ou animedes a participar a persoas interesadas neste ámbito», remata.

Inscrición e contacto

Os prezos establecidos para a inscrición son os seguintes: Matrimonio (130 euros) e individual (75 euros), ambas con pensión completa (inclúe a comida e a cea do sábado, a pernoita e o almorzo e a comida do domingo).

Naquelas parroquias que queiran iniciar ou potenciar a pastoral familiar, desde a delegación diocesana convídasenos a animar a algún matrimonio para participar nesta formación. Deste xeito terán máis medios para realizar esa tarefa pastoral nas súas comunidades. Desde a delegación están á nosa disposición para axudar nas inscricións ou ante calquera dúbida no teléfono: 699 417 676 (horario de tarde).