Pedro Rodríguez, arcipreste de Ferrol: «As mozas e mozos son esperanza de transmisión da fe e de futuro na tarefa dos vindeiros anos»

Continuando co balance do curso achegámonos aos nosos arciprestados. Tócalle nesta xeira a Ferrol, arciprestado formado por 26 parroquias. Estivemos co seu arcipreste Pedro Rodríguez Paz.

Que é o que máis se traballou neste arciprestado ao longo do curso á luz do plan pastoral diocesano?
Pensar en diocese, dar pasos cara a un estilo en sinodalidade. Por este motivo fixéronse grupos do Sínodo e continuouse a traballar con eles con outros moitos temas. En grupo realizamos moitas reunións de formación, traballouse sobre os ministerios laicais, formación litúrxica… Preocupounos moito que se comprenda o sentido misioneiro da Igrexa e do noso compromiso cristiano; coido que é moi necesario entender ese sentido de salir á misión.

Durante este ano continuose coa formación integral dos nosos axentes de pastoral nas parroquias; dende grupos coma a HOAC afondaron na dimensión social da fe. Xurdiu un grupo de adultos non confirmados e levamos adiante un ano de preparación para vivir ese sacramento nesa etapa da súa vida. Continuamos co traballo cos matrimonios e cos cursos prematrimoniais.

En Ferrol contamos cunha actividade de formación que leva xa bastantes anos uníndonos nunhas xornadas, coma é a Aula Aberta. Neste curso achegámonos aos condicionantes da “era postcovid” a través de tres conferencias con gran participación e que se celebraron na sede de AFundación no Cantón de Molíns.

Un arciprestado cheo de colexios relixiosos e de testimonial presencia de relixiosos e relixiosas. Que significa esto para o arciprestado?
Unha riqueza, colaboran moito na pastoral e traballo arciprestal e existe una moi boa conexión, como acontece tamén coa riqueza que aporta a implicación, colaboración e traballo das confrarías de Semana Santa. Nas Escravas tivemos os nosos encontros mensuais de oración do arciprestado. Neste curso continuamos cos retiros de Advento e Coresma, coas vixilias, coa participación na Festa da Misericordia e outros eventos diocesanos…

Cómo se vive a marcha dalgunhas congregacións ou relixiosos despois de tanto tempo de presenza?
Con verdadeira pena e cun inmenso agradecemento ao compromiso e traballo de tantos anos nos que se fixeron familia con tantas xentes e xeneracións de Ferrol. Realizaron unha tarefa social impagable e que deixa unha grande pegada na vida de Ferrol.

Como vemos o mundo da xuventude?
A delegación de Xuventude realizou unha tarefa moi intensiva de promoción, formación, oración tódolos mércores. Fixeron un moi bo traballo realizando mercadillos e modos para axudar a xestionar os gastos para a viaxe a quenes tivesen maior dificultade. Un bo grupo de mozos e mozas de Ferrol estarán próximamente na XMX e alédanos moito a súa presencia e colaboración nas vixilias da Inmaculada, Pentecoste, e a súa implicación en moitas celebración e momentos do noso arciprestado. Todos eles, xunto a tantos xoves que se implican nas confradías e nas súas bandas de música, son esperanza de transmisión da fe e de futuro na tarefa dos vindeiros anos.

Entrevista: Javier Martínez Prieto