Porto do Son acollerá o I Encontro de Seminarios Maiores de Galicia

Para o vindeiro 16 de maio convocouse un primeiro encontro de todos os seminarios maiores de Galicia. A cita terá lugar na localidade de Porto do Son (A Coruña), nunha leira pertencente á diocese de Ourense, habitual na celebración de encontros e retiros. A esta convocatoria están chamados os seminaristas pertencentes ao Seminario Interdiocesano Apóstolo Santiago, no que participa a nosa diocese de Mondoñedo-Ferrol, e tamén os seminarios maiores de Ourense e Lugo. Igualmente, están convocados os seminarios Redemptoris Missio de Lugo e Ourense.

O encontro terá lugar unicamente na xornada de mañá e consistirá, tras a presentación dos participantes, nun momento de conversación no Espírito e a celebración da eucaristía. Tras a comida visitarán a contorna e regresarán ás súas localidades.

Este tipo de encontros de seminarios é moi frecuente noutras rexións e contribúe a un traballo máis en comuñón e ao coñecemento dos propios seminaristas. Ademais axúdalles no seu camiño de resposta vocacional.