12 de novembro, Día da Igrexa Diocesana: “Orgullosos da nosa fe”

“Orgullosos da nosa fe”. Este é o lema que propón o secretariado para o Sostemento da Igrexa para a Campaña do Día da Igrexa Diocesana, que este ano se celebra o 12 de novembro. Un día de festa, de celebración, no que “lembramos e agradecemos a nosa pertenza a unha comunidade cristiá”. E un día para o agradecemento e para tomar conciencia de que somos membros dunha gran familia. O que a Igrexa fai “é grazas ao tempo, as calidades, a oración e o apoio económico de todo o pobo de Deus”.

«Orgullosos da nosa fe»

Co lema deste ano, o secretariado para o Sostemento da Igrexa sitúase nunha realidade: no contexto social actual non é fácil recoñecerse como crente en moitos ambientes. Así, convida a quitarse ese “sentimento” de “certa vergoña” para “mostrar o que somos e o que facemos, con humildade, convencidos de que Cristo e o evanxeo fan deste mundo un lugar mellor”.

Por iso, cada ano, o Día da Igrexa Diocesana pon en marcha esta campaña para reforzar ese sentimento de pertenza dos crentes e para “tocar” o seu corazón, tamén o daqueles que, por distintas circunstancias da vida, afastáronse da práctica relixiosa. Porque a celebración e a vivencia da fe son un motivo de alegría nun mundo sediento de esperanza. Tamén é unha oportunidade para recoñecer e agradecer todo o ben que fai a Igrexa.

Xuntos chegamos máis lonxe

Un ben que se fai posible pola corresponsabilidade. Non se trata de obrigar nin de impoñer, senón de promover un modo de seguir a Xesucristo. Para iso, propóñense catro alternativas de colaboración:

– A túa oración: Podes rezar pola túa parroquia porque a túa oración é necesaria e será a alma de toda a actividade que se realice. Con ela, os froitos serán maiores e máis permanentes.

– O teu tempo: Dedica algo do teu tempo na túa parroquia aos demais. O tempo que poidas: media hora, unha, tres horas… O que se axuste á túa situación de vida.

– As túas calidades: Cada un pode achegar un pouco do que sabe: un sorriso próximo, unha man que apoia un ombreiro desconsolado, remangarse cando sexa necesario, acompañar en silencio ao que sofre.

– O teu apoio económico: Fai un donativo. Coa túa achega periódica axudas máis, porque permiten elaborar orzamentos e mellorar a utilización dos recursos e planificar accións a medio e longo prazo.

Unha colaboración que fixo posible que máis de catro millóns de persoas puidesen ser atendidas en centros asistenciais da Igrexa; que suxeitan as máis de 22.000 parroquias que están ao servizo de toda a sociedade; e que sacerdotes, voluntarios e seglares poidan dedicar máis de 40 millóns de horas aos demais. Tamén grazas a esa corresponsabilidade, hai máis de 10.000 misioneiros españois nos cinco continentes.

Os protagonistas

Os protagonistas do Día da Igrexa Diocesana son todos os que forman parte da Igrexa e da súa misión, todo o Pobo de Deus. En España, a Igrexa católica estrutúrase ao redor de 70 diocese, 69 territoriais ás que hai que unir o arcebispado castrense. Segundo os datos da última Memoria anual de actividades, a Igrexa conta con 22.947 parroquias; 16.126 sacerdotes; 1.028 seminaristas; 35.507 relixiosas e relixiosos; 8.326 monxes e monxas de clausura; 10.382 misioneiros; e millóns de laicos. Deles, 408.722 forman parte dalgunha das 86 asociacións e movementos.

Difusión da Campaña

Para a difusión da campaña do Día da Igrexa Diocesana, o secretariado para o Sostemento da Igrexa elaborou distintos materiais: vídeos, carteis e cuñas de radio que están dispoñibles na páxina web de Xtantos. Os medios dixitais, as radios e as revistas relixiosas serán o leito de difusión do 31 de outubro ao 12 de novembro. Ademais, e a través dos delegados de medios de comunicación, tamén se fai presente en cada unha das dioceses españolas.

Que facemos? e Como o facemos?

Con motivo do Día da Igrexa Diocesana tamén se edita a Revista Nuestra Iglesia 2023. Unha edición por cada diocese que abre as súas páxinas co saúdo do bispo.

Ademais, cada publicación responde a dous interrogantes. Que facemos?, contando os datos da actividade celebrativa, pastoral, evanxelizadora, educativa, cultural e caritativa-social. E Como o facemos?, informado das contas da Igrexa local.

Complétase con noticias locais, que presentan exemplos concretos, para mostrar os rostros das persoas que sosteñen esas cifras.

Descarga dos materiais da xornada

Revista «Nuestra Iglesia 2023»
Cartel oficial «Orgullosos da nosa fe»
Subsidio litúrxico
Escrito do bispo de Mondoñedo-Ferrol