Os «Roteiros desde a fe» pechan o curso cunha visita ao castelo ferrolán de San Felipe

Cada vez máis persoas participan nos «Roteiros desde a fe», unha actividade mensual que organiza a delegación diocesana de Peregrinacións e Camiño de Santiago. Coordinados ás mil marabillas por Chema Pérez, o noso delegado, nesta ocasión os camiñantes fixeron dez quilómetros entre os barrios de Canido e San Felipe, no concello de Ferrol.

Ao chegar á entidade veciñal de San Felipe, o grupo tivo a oportunidade de visitar as instalacións do castelo, continuando cara a parroquia de Santa Cruz de Canido, onde os participantes gozaron dun aperitivo de recuperación.

Entre os integrantes do grupo atopábase o presidente da Asociación Veciña de Canido (e máis do centro cívico do barrio), Roberto Taboada, unha oportunidade para estreitar lazos entre a comunidade parroquial e a representación veciñal, quedando de manifesto a importancia de sumar esforzos para a consecución do ben común.

Con esta edición dos Roteiros péchanse as actividades deste curso 2024-2025, para regresar con novos folgos e novas ideas no mes de setembro.