A parroquia de Galgao celebrou a festa do San Cosme da Montaña

No día de onte, 27 de setembro, celebrouse no santuario de San Cosme, na parroquia de Galgao, en Abadín (Lugo), a festa do San Cosme da Montaña, como se dicía tradicionalmente. Unha festa que, cada ano, reúne a moita xente da montaña e da Mariña e mesmo de terras de Asturias.

Este ano gozamos dun espléndido día, temperado, que invitaba a visitar o santuario para cumprir cos servizos relixiosos aos que cada persoa se sinta chamada e a pasalo ben coa música, coas comidas ofrecidas. Para ser un día de semana, houbo moita xente, a maior parte xente das nosas aldeas que segue atopando nos santuarios un importante sostemento para a súa relixiosidade sinxela, pero fonda.

Houbo tres misas pola mañá (ás 10, 11,30 e 13 horas) e unha pola tarde (17:00 horas). Para a misa das 13:00 horas puidemos contar coa presenza do noso bispo diocesano, monseñor Fernando García Cadiñanos, quen animou a celebración coa súa presenza xenerosa, coa súa palabra viva, co seu compartir agarimoso.

Foi unha xornada espléndida, unha desas que suscitan ánimo e esperanza. Grazas a todas as persoas que contribuíron a que isto fose así.

Ofrecemos algúns dos materiais que se empregaron na celebración, por se a alguén lle poden valer para celebracións semellantes.

Oración «Eu ireia de romaría»
Benvida: Para poñer o santo en comunidade
Que nos ofrece a fe cristiá ante o mal e a enfermidade?

Crónica e materiais preparados polo equipo diocesano da Pastoral Rural.

Fotografía: Palacios. Vídeo: El Progreso A Chaira