A persoa máis libre do mundo

Os sicólogos axúdannos a dicir que non. Segundo eles dicir que non non é doado. Doado é dicir que si a todo ou a todos, por medo a dicilo que verdadeiramente pensamos, ou sexa, que non. Non sei se é por iso que oporse ou estar en desacordo -dicir que non- semella hoxe un dereito fundamental do que depende a saúde do noso sistema de liberdades. Para sermos libres temos que ter dereito a dicir que non. Se non podemos dicilo non somos libres.

Pero eu non estou de acordo nisto cos sicólogos nin cos políticos. Eu coido que o dificil non é dicir que non. O difícil é dicir que si. Dicir que non é certamente un dereito fundamental. Pero a liberdade non é só un dereito. A liberdade é moito máis ca un dereito. É a loita polos dereitos, o longo camiño que nos leva a sermos o que aínda non somos e a ter o que aínda non temos. Dicir que non non sempre ten consecuencias. Consecuencias tenas sempre dicir que si. Dicir que si pódenos traer moitos problemas e complicacións. Pero é a nosa verdadeira liberdade. Os dereitos veñen despois da loita e o camiño que nos levou a sermos o que somos e a termos o que temos.

A Igrexa contempla na Virxe María e no misterio do seu "sí" a mensaxe do anxo Gabriel, a imaxe do que ela mesma quere ser no medio da xente: mensaxeira da liberdade que Cristo ven traer o mundo. O "si" de María á mensaxe do anxo trouxo moitas complicacións a súa vida. Ela non vivía illada no seu mundo. Nazaré, a súa vila, Xosé, o home ao que estaba prometida, o feito de non ter aínda relación con el… todo isto e moitas outras circunstancias persoais que poderiamos imaxinar van facer fronte ao seu "si" e á súa liberdade. Aínda é hoxe o día no que son moitos os crentes para os que a virxindade de María é un conto.

Fronte a incredulidade, os ditos e os feitos sen xeito da xente do seu tempo e tamén do noso, as dificultades e os atrancos no camiño que levou a María a ser o que non era e a ter o que non tiña, o seu "si" é testemuño dunha liberdade que non é deste mundo. Dicir que si tróuxolle moitos problemas. De feito, non podería dicilo senón fora a chea de gracia, a persoa máis libre que neste mundo se viu. Os sicólogos e os políticos do noso tempo terían que aprender, coma ela, a dicir que si, a chegar a acordos, a facer fronte as consecuencias de seren verdadeiramente libres.

«Os sicólogos e os políticos do noso tempo terían que aprender, coma ela, a dicir que si, a chegar a acordos, a facer fronte as consecuencias de seren verdadeiramente libres»

Artículos relacionados

Síguenos

5,484FansMe gusta
4,522SeguidoresSeguir
1,230SuscriptoresSuscribirte

Últimas publicaciones

Etiquetas