Comunicado da Pastoral Rural ante o Día do Mundo da Aldea 2023

Desde a delegación diocesana de Pastoral Rural queremos compartir con todos vós o que pensamos facer para conmemorar o Día do Mundo da Aldea 2023, no 15 (14) de maio, festividade de San Cidre, nesta ocasión baixo o lema «Da aldea con orgullo e esperanza«.

Acordamos celebrar esta data cada ano nunha bisbarra ou comarca rural da nosa diocese.
Este ano será nas terras do Valadouro (Alfoz e Ferreira, Lugo). Se celebramos o Mundo da Aldea é porque estamos convencidos de que as nosas aldeas e zonas rurais tiveron un papel, un significado fundamental na configuración do corpo e da alma da nosa diocese, e porque cremos que, a pesar de todo o que poidamos pensar, poden ser un referente importante para o noso futuro inmediato, tanto a nivel civil como tamén relixioso. O mundo da aldea, o mundo rural, está fráxil, pero non morto.

Nesta conmemoración poñeremos en valor a vida da aldea como espazo xeográfico, como medio natural, como lugar con historia particular, onde floreceu a arte, a cultura, a relixiosidade, a fala galega; como lugar de terras de produción, de coidado dos animais domésticos e salvaxes, que permitiron vivir aos nosos antepasados ata o presente. Ser aldeán, aldeá, é un orgullo.

Non queremos pechar os ollos ante as dificultades presentes, de todo tipo. Queremos identificalas para asumir o inevitable, pero tamén para reivindicar as medidas que permitan ter un rural vivo, no aspecto civil e tamén no relixioso. É tanta a riqueza, os recursos que as aldeas nos ofrecen que non nos colle na cabeza que quedemos no seo da manta vendo como esmorecen. É cousa de todos, dos que nelas aínda vivimos, e tamén, e moito, de quen rexe as diferentes administracións que nos gobernan.

Contando coa colaboración de persoas do lugar e despois do traballo realizado en varios encontros, isto é o que faremos para conmemorar esa xornada:

· A celebración trasládase do 15, luns, ao 14, domingo, para facilitar a presenza da xente.

· Ese día suprimiranse todas as misas que puidese haber nos dous concellos do Valadouro, invitando a participar nunha eucaristía de agradecemento e solidariedade cara ao mundo da aldea, que celebraremos xuntos ás 13:00 horas na igrexa de Ferreira do Valadouro.

· A celebración está aberta a persoas do mundo da aldea doutras zonas rurais da diocese, que queiran vir, e será presidida polo noso bispo Fernando.

· A celebración terá un aire festeiro; así, seremos acollidos por un grupo de música tradicional, que tamén nos acompañará pola tarde.

· Ao comezo da celebración lerase un comunicado elaborado para a ocasión por veciños e veciñas da comarca. Tamén nese momento se lerán outros comunicados breves de presentación de grupos que poidan vir doutras zonas da diocese.

· Dispoñeremos dun caderniño para poder participar ben na celebración.

· Despois da eucaristía iremos xantar ás 14:30 horas ao restaurante «O Frenazo», en Alfoz. Informaremos próximamente para formalizar a inscrición.

· Depois do xantar, faremos algo de festa e baile, acompañados polo grupo «Amado lar».

E querendo participar no xantar compartindo mesa co resto dos grupos, deben inscribirse antes do día 7 de maio. Para facelo, poñédevos en contacto con esta delegación de Pastoral Rural, ben por correo electrónico (rural@mondonedoferrol.org), ben por teléfono (669 607 675). O xantar custa 16 euros, que se pagarán ao entrar no restaurante.

Se non podedes ou non queredes vir, invitámosvos igualmente a que nas vosas respectivas
parroquias e comarcas celebredes con orgullo este Día do Mundo Rural, do Mundo da Aldea. Desde esta delegación mandarémosvos algún material que vos facilite poder facelo.

Fotografía: Bernabé/Javier (La Opinión A Coruña)