Constituído en Vilalba o Consello Pastoral do arciprestado de Terra Chá

• Segrares, relixiosas e sacerdotes deseñan xuntos as liñas de traballo para a visita pastoral ao arciprestado
• Monseñor García Cadiñanos animounos a saír do “sentido parroquial” para compartir iniciativas e camiñar en clave de misión

O pasado venres 28 de novembro, na casa parroquial de Vilalba, en torno ao bispo don Fernando, constituíuse o Consello Pastoral do arciprestado de Terra Chá. Nel están representadas todas as UPA que conforman este arciprestado a través de trece segrares, a comunidade relixiosa das Misioneras de Acción Parroquial e os sacerdotes. En total, dezanove membros, cunha gran variedade de orixe, idade, condición e experiencia eclesial, o que supón unha riqueza e unha potencialidade para este novo órgano.

Dixido polo arcipreste de Terra Chá, o sacerdote Juan Basoa, no encontro expúxose que é un arciprestado, que funcións ten este Consello e que se busca coa visita pastoral. Tamén se lembraron algúns momentos da historia do arciprestado e entregouse para o seu comentario exemplares do Estatutos do Consello Arciprestal.

Pola súa banda, durante a súa intervención, o bispo diocesano propuxo un diálogo aberto sobre tres cuestións: a necesidade do arciprestado na vida eclesial, a acción evanxelizadora da Igrexa o significado da visita pastoral. Tras o diálogo, os conselleiros consideraron que a visita pastoral é un momento para que o bispo poida coñecer a a realidade, achegarse aos colectivos e institucións da zona e animar as iniciativas e procesos que se están a xestar.

O encontro rematou coa celebración da eucaristía na igrexa de Santa María de Vilalba, presidida polo bispo e concelebrada polos sacerdotes do arciprestado, na que se lle entregou aos seglares representantes no Consello o nomeamento oficial da súa elección onde se recollen as súas atribucións. Durante a homilía, o bispo animoulles a descubrir a realidade diferente que vivimos e que nos fai abrirnos a outra forma de vivir e evanxelizar, «saíndo do noso sentido parroquial para camiñar con outros», destacou.

Inaugurouse así de forma oficial a visita pastoral que neste curso monseñor García Cadiñanos fará ao arciprestado de Terra Chá. Neste apartado da web atoparedes os materiais oficiais e toda a información relativa á visita.