Facebook Instagram Twitter

Para orar cada día

14ª Semana del Tiempo Ordinario
Sábado 12 de julio de 2025. Festividad de San Juan Gualberto
Comentarios preparados por el sacerdote diocesano Xaquín Campo

«Non lles teñades medo aos que matan o corpo pero non poden matar a alma»

Mateo 10, 24-33

Non é o discípulo máis que o seu Mestre, nin o servo máis ca o seu Señor. Abóndalle ao discípulo chegar a ser coma o seu Mestre; e ao servo coma o seu Señor. Se ao dono da casa o alcumaron Belcebul, canto máis aos da súa casa! Pero non lles teñades medo, que non hai cousa encuberta que non se acabe descubrindo, nin cousa oculta que non se acabe sabendo. O que vos digo na escuridade faládeo á plena luz; e o que oídes ás agachadas pregoádeo desde as azoteas. Non lles teñades medo aos que matan o corpo pero non poden matar a alma; temede máis ben a aquel que pode botar a perder o corpo e a alma no inferno. Non se venden un par de pardais por catro patacos? E non cae o primeiro no chan sen o consentimento do voso Pai. Pois vós, mesmo tedes contados os cabelos todos da cabeza. Así que non teñades medo, que vós valedes máis ca todos os pardais xuntos. O que volva por min diante dos homes tamén eu hei volver por el diante de meu Pai celestial. Pero quen me negue diante dos homes, eu negareino a el diante do meu Pai celestial.


Comentario

Se alguén pensar que a pertenza á Igrexa xa é un refuxio seguro, a cuberto de toda tempestade e persecución e tempestade, ler o Evanxeo e escoitar as verbas de Cristo. Non teñades medo. Quen se declarar por min diante dos homes, eu declarareime por el/ela diante do Pai que está nos Ceos. “Non temades aos que só poden matar o corpo”. “Os perseguidores son impotentes fronte á verdadeira vida”.

Os discípulos de Cristo han manterse confiantes ata no medio das persecucións. Pois o Pai celeste vela por eles. Pero é preciso manterse firmes na fidelidade ao Mestre. E o Espírito alentará sobre as súas vidas. Quen vive na paz solidarícese e ore polos irmás e irmáns que están a sufriren persecución, calumnia, martirio e violencia polo nome de Cristo e dos cristos vivos de cada tempo e lugar, para saberen que o Mestre os fortalece na proba. O Evanxeo, a Boa Noticia de Deus, ha trunfar e a inocencia deles será posta á plena luz e brillará. O Pai coida dos pobres e dos perseguidos, está da súa parte. Cristo será avogado no xuízo, se o tiveren confesado sen medo. O Espírito alentará vida na súa debilidade.


Para reflexionar

· VER: O mundo dá medo: mentiras, calumnias, persecución, abusos, xenocidios,… Realmente son de temer!

· XULGAR: “Non temades aos que só poden matar o corpo”.

· ACTUAR: Os humildes, buscade ao Señor, e revivirá o voso corazón (Sal 104).


Oración

Non teñades medo, meu pequeno rabaño, di o Señor, pois foi do agrado do Pai darvos o Reino: O Señor está no medio de nós. Amén. El mirou a humildade da súa serva e derruba do trono aos poderosos. Amén. Maranatha!, Vén, Señor, Xesús! Amén.