Referencias históricas

Edificio inaugurado en 1963, obra do arquitecto Vicente García Lastra, situado no barrio de Canido, fronte ao incomparable marco da ría de Ferrol. O proxecto foi considerado no seu momento como un logro harmónico de funcionalidade e elegancia de liñas.

Sendo bispo diocesano monseñor Jacinto Argaya Goicoechea, auténtico valedor de que a Domus fose unha realidade, colocouse e bendixo a primeira pedra en agosto de 1961. Estando aínda en construción foi visitada polo nuncio da súa santidade en España, monseñor Antonio Riberi, quen a bautizou co nome de «Domus Ecclesiae».

Funcionou orixinalmente, ademais de como residencia episcopal, de convitorio sacerdotal agregado á Universidade Pontificia de Salamanca; tamén acollería a sede de diversas asociacións e movementos de seglares que desempeñaban tarefas apostólicas. En 1966 instalouse nas súas dependencias a primeira emisora de radio diocesana, a primeira de Galicia, incorporada á Cadena de Ondas Populares Españolas (COPE). Funcionou tamén como residencia universitaria ata o ano 2007.

Na actualidade alberga a residencia oficial do bispo na cidade, as oficinas administrativas, o tribunal eclesiástico, o arquivo administrativo diocesano, a secretaría de Comunicación, o Servizo de Publicacións, os despachos das delegacións; ademais da biblioteca-hemeroteca ‘Estudios Mindonienses’.

Situación e contacto

Miramar, s/n, 15401, Ferrol (A Coruña)
981 353 295 | 981 353 200
De luns a venres, de 08:00 a 15:00 h.; os martes e xoves, de 16:00 a 18:00 h. (de xuño a outubro).

Referencias bibliográficas

· “Domus Ecclesiae, ano primeiro (1963-1964)”, en EstudIos Mindonienses, 29, 2013, pp. 341-518.
· “Memoria histórica do barrio de Canido”, Embora, 2019. Inclúe o artigo: “«Domus Ecclesiae: Orixe dunha Igrexa diferente para Ferrol«.“.