Escola Diocesana de EvanxelizaciónEscuela Diocesana de Evangelización

Que é a Escola Diocesana de Evanxelización?

Trátase de crear en todas as parroquias/UPA da nosa diocese espazos/comunidades de cristiáns que, xuntos:

· Dialoguen sobre a súa fe e dean razón da súa esperanza.
· Recen e lean o Evanxeo xuntos.
· Compartan experiencias e anhelos no noso mundo.
· Comprométanse na transformación do Reino.
· Cren espazos de encontro e diálogo.

Búscase crear grupos de crentes adultos que, desde un Plan de Formación para a Misión, fortalezan a identidade cristiá e eclesial e saiban anunciar a alegría do Evanxeo.

Por que?

Porque a sinodalidade presente na nosa Igrexa dános un novo dinamismo que temos que aprender. Habemos de aprender a camiñar xuntos, a atoparnos xuntos e proxectarnos xuntos. Esta Escola quere axudarnos a xerar este dinamismo novo que o Espírito ofrece á nosa Igrexa.

Porque nos tempos que vivimos é importante formarse para profundar na nosa identidade e responsabilidade dentro da nosa Igrexa e como cristiáns no mundo.

Porque nos faltan espazos e comunidades que saiban acoller e acollerse, ofrecendo coñecementos, habilidades e instrumentos axustados ao mundo de hoxe.

A quen vai dirixido?

Todas e todos estamos convidados a esta experiencia de crecemento xuntos: sacerdotes, relixiosos e laicos.

Como o faremos?

Cada parroquia/UPA establecerá a súa propia dinámica en función da súa realidade. Trátase de crear comunidades de cristiáns que se atopen periodicamente: todas as semanas ou cada quince días, unha vez ao mes ou unha tarde de domingo…

Cada ano trataranse dous temas a nivel diocesano que se presentarán de maneira que todos camiñemos na mesma dirección. Cada tema estruturarase en tres momentos, que poden corresponder a tres sesións:

· Presentación do tema e diálogo (1ª sesión, a mesma para toda a diocese).
· Estudo e oración desde o Evanxeo (2ª sesión).
· Diálogo e conclusións (3ª sesión).

Cunha filosofía de fondo…

A formación debe de ser integral. Ten que coidar as diferentes dimensións:

· Perspectiva intelectual: Un camiño sistemático e organizado que nos axude a coñecer mellor nosa fe.

· Perspectiva espiritual: Trátase de acoller a voz do Espírito e deixarnos guiar polos seus camiños, como Xesús.

· Perspectiva sinodal: Queremos crecer como Iglesia, facelo xuntos uns con outros, axudándonos a ser cristiáns e a seguir a Xesús.

· Perspectiva apostólica: Todo debe de estar en función da misión, acollendo así as experiencias apostólicas significativas.

Ademais, trátase de xerar evanxelizadores que descubran que se evanxeliza evanxelizando o noso mundo de hoxe, compartindo as experiencias que vimos realizando e desde a proximidade e pequenez do que somos: todos imos aprendendo uns doutros e de Xesús, o noso Mestre.

Organización

A vigairía para a Evanxelización encargarase de coordinar este novo espazo formativo da diocese. Para iso, anualmente elixirá as dúas temáticas que se abordarán, estreitamente vinculadas ao Plan Diocesano de Pastoral. Ademais, en unión coas distintas delegacións de pastoral, publicará os materiais adecuados para que se poidan completar as sesións con facilidade.