Español
Galego
981 35 32 95
mcs@mondonedoferrol.org
A Cátedra Diocese-Universidade da Coruña, na procura dos seus obxectivos de fomentar o intercambio de coñecemento e experiencias nos campos do patrimonio artístico e documental, e a conciencia social e a solidaridade real mediante a divulgación de iniciativas culturais e de promoción humana, vén de anunciar a celebración das Xornadas “Bibliotecas e Responsabilidade Social“, que traerá á cidade de Ferrol a algúns dos maiores especialistas neste ámbito.
Aínda co eco da recente celebración do Día das Bibliotecas 2023, baixo o lema “Tecendo comunidades”, as Xornadas terán lugar o vindeiro venres 10 de novembro na facultade de Humanidades e Documentación do Campus Industrial de Ferrol, e contará con catro relatorios e un faladoiro.
En canto ás temáticas e conferenciantes, está prevista a participación de Roberto Soto, presidente-fundador da Asociación de Profesionais de Bibliotecas Móbiles de España (ACLEBIM), cun relatorio centrado nas bibliotecas rurais, con tanta presenza e actividade na nosa diocese. Doutra banda, o responsable de Innovación Bibliotecaria da Deputación de Barcelona, Andreu Orte, falará sobre o modelo bibliotecario XBM, un referente na relación dos usuarios cos servizos bibliotecarios, os espazos, a colección e a tecnoloxía. A directora da biblioteca da Universidade Pontificia de Salamanca e directiva da Asociación de Bibliotecarios da Igrexa en España, Maribel Manzano, analizará a responsabilidade social das bibliotecas. E María José Rucio, xefa da sección de Manuscritos e Incunables da Biblioteca Nacional Española, falará sobre boas prácticas bibliotecarias.
Programa das Xornadas
09:45 h. – Presentación das Xornadas “Bibliotecas e Responsabilidade Social”, por Rocío Ameneiros Rodríguez, directora da Cátedra Diocese-UDC.
10:00 h. – Relatorio 1: A biblioteca rural en España: últimas iniciativas desde o Ministerio de Cultura e Deporte, por Roberto Soto Arranz, xefe de Sección de Coordinación de Bibliotecas na Deputación Provincial de León e presidente-fundador da Asociación de Profesionais de Bibliotecas Móbiles de España.
11:00 h. – Relatorio 2: Evolución das bibliotecas da provincia de Barcelona: preservación da esencia e proxección ao futuro, por Andreu Orte del Molino, xefe da Unidade de Programación e Innovación Bibliotecaria da Deputación de Barcelona.
12:00 h. Pausa-Café (na galería principal da facultade).
12:30 h. Relatorio 3: Ata onde é responsable a responsabilidade social nas nosas bibliotecas?, por Maribel Manzano García, directora da biblioteca da Universidade Pontificia de Salamanca (UPSA).
13:30 h. Pausa-Descanso.
16:00 h. – Relatorio 4: As boas prácticas dun bibliotecario de fondo antigo, por María José Rucio Zamorano, xefa da Unidade de Manuscritos e Incunables da Biblioteca Nacional de España (BNE).
17:00 h. Faladoiro: “Bibliotecas: tecendo comunidades”.
18:00 h. Despedida e peche.
Destinatarios, inscrición e certificacións
As Xornadas están dirixidas ao público en xeral, cunha chamada especial ao alumnado, profesorado e persoal da UDC, profesionais das bibliotecas, arquivos e centros de documentación, axentes sociais e culturais, ONG e membros da comunidade diocesana especialmente vinculados aos ámbitos da cultura, o patrimonio e a promoción social. A entrada é libre ata completar aforo.
A inscrición deberá formalizarse (antes das 14:00 horas do 8 de novembro) a través deste formulario online: https://forms.office.com/e/54xVV8Sgpq
Segundo informa a dirección da Cátedra, o certificado de asistencia darase por solicitude expresa e só no caso de asistencia presencial.
Actividades da Cátedra en 2024
Na programación oficial para o vindeiro ano 2024, a Cátedra Diocese-UDC desenvolverá varias conferencias, un premio de investigación académica, diversos estudios patrimoniais e sociolóxicos, e varias becas de colaboración nas bibliotecas e arquivos diocesanos de Mondoñedo e Ferrol para alumnos e graduados da UDC. De todo elo irase informando durante os vindeiros meses de novembro e decembro.
