A diocese inicia o Tempo da Creación cunha celebración interrelixiosa en Caranza

• O acto, con 60 participantes, marcou o inicio do Tempo da Creación na diocese, que se prolongará ata o vindeiro 4 de outubro

Unhas sesenta persoas, convocadas pola Vigairía para a Caridade, reuníronse onte no entorno da ermida de Caranza para celebrar a Xornada Mundial de Oración polo Coidado da Creación. O acto estivo presidido polo bispo diocesano, monseñor Fernando García.

A celebración desenvolveuse no marco da chamada Via Creatinis, un itinerario de oito estacións que convida a un percorrido de oración e contemplación á luz dos primeiros capítulos do Xénese. De xeito análogo ao viacrucis, que conmemora a Pasión de Cristo, este Camiño da Creación propón deterse e agradecer o misterio da creación do cosmos. En cada estación, a lectura do texto bíblico detívose sucesivamente nos días da creación: a luz, a terra e o mar, os corpos celestes, as criaturas das augas, os seres vivos da terra, o ser humano e o descanso.

No encontro participou tamén un grupo de persoas musulmás, especialmente invitado para a oración. Trátase dun colectivo de migrantes acompañados por Cáritas, que interviñeron coa lectura en árabe das distintas estacións. Deste xeito, a celebración converteuse nunha oración interrelixiosa en torno ao Deus Creador.

Ao finalizar o encontro, o bispo puxo en valor o paraxe natural de Caranza, a presenza dos irmáns musulmáns e o compromiso ético polo coidado do medio ambiente como responsabilidade propia de todo crente.

Desde a Vigairía para a Caridade invítase ás parroquias e UPA da diocese a organizar, ao longo deste Tempo da Creación —iniciado onte e que se prolongará ata o 4 de outubro, festa de san Francisco de Asís—, celebracións semellantes. A proposta consiste en acudir en peregrinación a algún lugar significativo do entorno parroquial, especialmente vinculado á natureza, e desenvolver alí unha pequena celebración que anime ao coidado da “casa común”.