A Pastoral Penitenciaria de Galicia rendiu homenaxe ao sacerdote Xaquín Campo

O pasado luns 16 de decembro, o arcebispo de Santiago de Compostela, monseñor Francisco José Prieto Fernández, visitou o Centro Penitenciario de Teixeiro para celebrar o Nadal coa comunidade penitenciaria. Á súa chegada foi recibido polo voluntariado da Pastoral Penitenciaria e o director do centro.

Más de cen persoas, entre internos, funcionarios e voluntarios, participaron na eucaristía, que se celebrou nun ambiente de recollemento, alegría e esperanza. Durante a celebración, don Francisco destacou a importancia de recibir a Deus cunha mirada sinxela e un corazón aberto, tal como fixeron os pastores ao nacer Xesús. Tamén falou da esperanza que Deus ofrece, subliñando que nunca se avergoña de ninguén e mira a todos con amor paternal.

A xornada concluíu cun xantar en homenaxe a Xaquín Campo Freire, sacerdote da diocese de Mondoñedo-Ferrol, que dedicou máis de quince anos á Pastoral Penitenciaria e que agora se retira por motivos de saúde. Xaquín seguirá vinculado á delegación diocesana de Pastoral Penitenciaria nas súas actividades de sensibilización, acollida e acompañamento. Como diocese, unímonos ao agradecemento da Igrexa compostelá polo seu servizo e entrega.