Cando coidar tamén significa estar preto

• Vigo acollerá unha xornada para o voluntariado de Pastoral da Saúde de Galicia dedicada á escoita, o acompañamento e a atención ás persoas que sofren

Acompañar a unha persoa enferma non consiste unicamente en asistila. Tamén implica saber escoitar, respectar os seus tempos, recoñecer a súa fraxilidade e permanecer ao seu lado cando as palabras non bastan. Con esta perspectiva, o Seminario Maior San José de Vigo acollerá o sábado 17 de outubro unha xornada de formación dirixida aos voluntarios de Pastoral da Saúde das parroquias galegas.

«Acompañar. Escoitar. Servir. O amor de Cristo, preto do que sofre» é o lema elixido para un encontro que combinará reflexión teolóxica, formación práctica e celebración comunitaria. A xornada pretende fortalecer o labor de quen ofrece o seu tempo e a súa presenza ás persoas enfermas en parroquias, centros hospitalarios, residencias e outros espazos de atención.

Un dos momentos principais será a conferencia «Descubrir ao Resucitado nas chagas do irmán», a cargo do sacerdote Jesús Martínez Carracedo, antigo delegado nacional de Pastoral da Saúde da Conferencia Episcopal Española. A proposta parte dunha relectura do Bo Samaritano para expor como responder, desde a fe, ás feridas e necesidades do próximo.

A xornada prestará unha atención especial á saúde mental. Agustina Portabales Pesqueira, traballadora social do Hospital Álvaro Cunqueiro de Vigo, gerontóloga e criminóloga, impartirá un taller sobre o encontro, a escoita e a atención a persoas con enfermidades psiquiátricas. Será un espazo de carácter práctico para abordar as dificultades que poden xurdir no acompañamento e para promover actitudes baseadas na comprensión e a dignidade.

O programa comezará ás 10.00 horas e concluirá ás 17:45, despois da celebración da eucaristía e da clausura. A inscrición ten un prezo de 40 euros, con comida, e de 15 euros, sen comida.

Un retiro para quen coida

Por outra banda, o Centro de Espiritualidade San Ignacio, en Salamanca, acollerá do 30 de outubro ao 2 de novembro un retiro dirixido a profesionais e voluntarios vinculados ao ámbito sanitario. A convocatoria está aberta a médicos, enfermeiras, psicólogos, fisioterapeutas, capeláns, voluntarios e axentes de Pastoral da Saúde.

Co título «Alimentados con pan de bágoas», o retiro estará dirixido por Francesco Cocco, profesor de Sacra Escritura, e propoñerá un itinerario de reflexión espiritual ao redor da experiencia do sufrimento, o coidado e a esperanza.

As persoas interesadas poden solicitar información e inscribirse a través de María Pérez da Blanca, na dirección de correo electrónico maria.perezdlb@gmail.com ou no teléfono +34 722 64 23 11.