Chegan á diocese os Sementadores de Estrelas!

• Sementadores de Estrelas 2025: “Moitos pensan que o máis importante do Nadal son os agasallos, pero en realidade é estar alegres de que Xesús naza”
• Nenos e nenas converten as súas panxoliñas en mensaxes de fe e alegría

Durante estes días, previos á festa do Nadal, algunhas parroquias e colexios da nosa diocese secundaron a invitación da delegación de Misións de Mondoñedo-Ferrol e lanzáronse a organizar a actividade “Sementadores de Estrelas”.

Trátase de saír cantando panxoliñas polas rúas do barrio ou visitando algúns centros e institucións para felicitar o Nadal. Como xesto misioneiro búscase que os nenos e nenas se acheguen ás persoas que se atopan e coloquen nas súas lapelas unha estrela desexando un bo Nadal. Cumpriríase así unha acción misioneira que nos empuxa a saír da nosa contorna para ir ao encontro do outro nese primeiro anuncio do nacemento de Cristo: “Cristo ámate e naceu por ti”.

Ata a delegación chegaron as mensaxes do Colexio “O Pilar” de Foz; do CPI de San Sadurniño; do Colexio Sagrado Corazón de Jesús de Ribadeo (15 de decembro); e da parroquia de Santa María de Caranza-Ferrol (21 de decembro).

Para os organizadores desta iniciativa supón un xesto “moi sinxelo pero moi fermoso: achegar o Nadal dos nosos misioneiros ata as nosas casas, axúdanos a ser misioneiros e é unha forma de introducir aos nenos e ás súas familias na mensaxe do Nadal”.