"Estudios Mindonienses" homenaxeará a Segundo Pérez López cun volume conmemorativo

A través dunha comunicación dirixida aos membros dos consellos de redacción e asesor-científico, o director do anuario diocesano “Estudos Mindonienses”, Benito Méndez, transmitiu a intención de dedicar o próximo número da revista ao teólogo, cóengo da SAMI Catedral de Santiago de Compostela, Segundo Leonardo Pérez López, con motivo da conmemoración do 75º aniversario do seu nacemento e do 50º da súa ordenación sacerdotal.

“A súa traxectoria como profesor, párroco, cóengo e investigador é ben coñecida e valorada en moitos ámbitos. Pero, no noso caso, como membros do consello de “Estudos Mindonienses”, como diocesanos e como cidadáns desta terra galega, como amigos e colaboradores, habemos de recoñecer o seu labor impagable. Non só tivo a idea de crear o anuario, senón que o impulsou con mestría ata facelo chegar onde hoxe está“, informábase no comunicado remitido no día de onte.

Desde a dirección e secretaría da revista decidiuse dedicarlle o próximo número, o 36, correspondente ao ano 2023, para o que convida a todos aqueles investigadores, sacerdotes e compañeiros a contribuír a esta homenaxe con algún artigo ou outro tipo de escrito (temática non exclusivamente relacionada coa diecese e sen límite de extensión).

O prazo de recepción de traballos rematará o 31 de agosto de 2023, e poden remitirse á conta de email estudiosmindonienses@mondonedoferrol.org

Fotografía: Sandra Alonso (La Voz de Galicia)