María Victoria González, nova directora da Federación das Cáritas de Galicia

• A directora de Cáritas diocesana de Mondoñedo-Ferrol asume a responsabilidade autonómica, que se renova cada catro anos entre as entidades diocesanas galegas

Con data 1 de febreiro, María Victoria González, directora de Cáritas diocesana de Mondoñedo-Ferrol foi nomeada tamén directora de Cáritas federadas en Galicia. Esta federación está conformada actualmente polas Cáritas de Santiago, Ourense, Tui-Vigo e a propia de Mondoñedo-Ferrol.

A dirección da federación pasa de maneira rotativa por cada un dos directores das Cáritas diocesanas que o compoñen. O cargo osténtase por catro anos. María Victoria accede á dirección relevando no posto a María Tabarés, actual directora de Cáritas Ourense.

O obxectivo desta federación é “coordinar, orientar, promover e federar a acción caritativa e social no ámbito das dioceses”. Os seus fins son desenvolver accións de inclusión, coordinar e promover iniciativas, estudar problemáticas comúns e levar a cabo campañas de sensibilización, entre outras.

Desde a súa creación vaise desenvolvendo un traballo interesante de intercambio de experiencias e de proxectos comúns. Ademais, coordínanse coa Administración autonómica á hora de promover políticas sociais e na procura de recursos. Organizan tamén actividades formativas comúns para os traballadores e axentes de Cáritas e convocan anualmente unha xornada autonómica de voluntariado. Teñen tamén asinados acordos con fundacións a nivel autonómico e desenvolven actividades de apoio ás Cáritas federadas.