O santuario dos Remedios de Mondoñedo prepárase para a festa grande na honra da Virxe

• A novena comezou o venres 4 e culminará o domingo coa eucaristía presidida polo bispo diocesano e a ofrenda da alcaldesa de Vilalba

O santuario da Nosa Señora dos Remedios de Mondoñedo acolle estes días os actos relixiosos con motivo da festa grande na honra da Virxe dos Remedios, patroa da cidade e de toda a diocese mindoniense-ferrolá.

A novena, que deu comezo o pasado día 4, celébrase ás 9:00 e ás 19.30 horas. Nesta última quenda ten lugar a predicación, que este ano desenvolveron os sacerdotes José Boullosa, Benito Méndez e Óscar Fernández. Da parte musical encargouse o Coro Mindoniense.

O día grande terá lugar este domingo ás 12:00 horas, coa celebración eucarística presidida polo bispo diocesano, monseñor Fernando García. Durante a cerimonia celebrarase a ofrenda á Santísima Virxe dos Remedios, que neste 2026 presentará a alcaldesa de Vilalba, Marta Rouco. Deste modo, mantense a tradición de que a ofrenda sexa realizada polos rexedores dos distintos partidos xudiciais da diocese de Mondoñedo-Ferrol. A música correrá a cargo da Coral Polifónica Vilalbesa.

Ese mesmo día haberá ademais celebracións eucarísticas no santuario ás 10:00, 11:00, 13:30, 18:00 e 19:00 horas.

O luns 14, día dedicado á Confraría, celebrarase unha eucaristía ás 12:30 horas no santuario por todos os defuntos da mesma.