37º Foro Encrucillada: Doutrina social da Igrexa e traballo digno

Un ano máis a Asociación Encrucillada convídanos a participar no XXXVII Foro Encrucillada para dialogar sobre unha cuestión que cada día preocupa máis na nosa sociedade: o traballo digno. Será o vindeiro sábado 21 de outubro no salón de actos do colexio da Compañía de María en Santiago de Compostela.

“Que traballo queremos para o século XXI? A doutrina social da Igrexa ten reflexionado abondo sobre este tema dende o século XIX. A situación actual de globalización e deslocalización, a crise económica e a migración, fannos mirar de fronte e abordar con seriedade as causas que están a producir a precariedade laboral. O traballo é un dereito universal que dun tempo a esta parte se está a ver cada vez máis desvalorizado”.

A través desta xornada o Foro Encrucillada busca ver que mensaxe actual ten a Igrexa para iluminar esta realidade. Sobre as liñas mestras da teoloxía do papa Francisco nesta cuestión falará monseñor Fernando García Cadiñanos, bispo de Mondoñedo-Ferrol. Francisco Porcar Rebollar, militante da IOAC-HOAC, poñerá o foco na doutrina social da Igrexa, buscando xerar unha nova cultura política desde a perspectiva do ben común e a xustiza. Eloína Ingerto López, da Fundación Juan Soñador, acercaranos á realidade do traballo digno en Galicia, facendo a necesaria aterraxe de todas estas cuestións na nosa terra. Rematarase cun breve momento de reflexión persoal iluminada polas palabras de persoas que fixeron do dereito ao traballo digno a súa loita.

Este será o horario:
10:00 h.- Presentación do XXXVII Foro Encrucillada. Intervención de Tito Suárez Pérez. 10:30 h.- “O traballo á luz do pensamento do papa Francisco”, por monseñor Fernando García Cadiñanos, bispo de Mondoñedo- Ferrol.
12:00 h.- Descanso
12:30 h.- “O traballo na doutrina social da Igrexa”, por Francisco Porcar Rebollar, IOAC-HOAC.
16:30 h.- “Unha vida digna, un traballo digno”, por Eloína Ingerto López, Fundación Juan Soñador.
18:00 h.- Peche do acto

Para máis información pódese consultar a web www.encrucillada.gal