O Consello Diocesano de Pastoral avalía o plan 2021‑2026 e marca as claves do novo curso na diocese

• Aprobou ampliar o Equipo Diocesano Sinodal e fixou para o 11 e 12 de xuño a Asemblea Diocesana, no marco do proceso sinodal universal

O Seminario Santa Catalina de Mondoñedo acolleu o pasado 19 de setembro a celebración do Consello Diocesano de Pastoral, presidida polo bispo diocesano, Fernando García Cadiñanos. O encontro, que abriu cun momento de oración e de benvida, centrouse na revisión do Plan Diocesano de Pastoral concluído en 2026 e na presentación do itinerario para o curso 2026‑2027.

Aínda que as liñas xerais do plan foron prorrogadas para o presente curso, a reunión serviu para avaliar os seus aspectos máis relevantes. Para iso, traballouse sobre un documento remitido con antelación aos asistentes, que funcionou como informe de rendición de contas. Tras un tempo de reflexión e intercambio en grupos, o Consello valorou de forma moi positiva o plan, destacando dúas fortalezas: ser froito das achegas de numerosas persoas e ter actuado como unha auténtica folla de ruta para coordinar e planificar a vida diocesana. O seu carácter xeral facilitou, ademais, que todos se sentisen cómodos nel.

O segundo eixo da xornada foi a presentación do próximo curso pastoral, marcado polo proceso sinodal universal, que convoca asambleas diocesanas en todas as dióceses no primeiro semestre de 2027. A diocese asumiu este proceso como marco para avaliar a súa acción pastoral a partir do documento sinodal. Gonzalo Varela, vigairo xeral, detallou o Itinerario Pastoral 2026‑2027, precisando obxectivos e calendario.

Tras un espazo de diálogo, o Consello adoptou dous acordos relevantes: ampliar con máis membros o Equipo Diocesano Sinodal e celebrar a Asemblea Diocesana os días 11 e 12 de xuño. Encomendouse ao propio Equipo Sinodal a concreción dos membros que participarán nela.

Para pechar o encontro, abordouse a metodoloxía de elaboración do próximo plan pastoral. Despois dun debate rico e participativo, acordouse convocar unha reunión extraordinaria en febreiro para definir conxuntamente a estrutura e as claves sobre como se quere afrontar a redacción do novo plan.

DESCARGA Itinerario pastoral 2026-27 en Mondoñedo-Ferrol (PDF)