A biblioteca da Domus Ecclesiae remata o inventariado do seu fondo antigo

A biblioteca “Estudios Mindonienses” de Ferrol continúa dando pasos en canto á posta en valor do seu fondo documental. Tras a súa inclusión na Rede de Bibliotecas de Galicia o pasado mes de novembro, agora, e grazas a un novo convenio de colaboración, nesta ocasión coa Universidade de Santiago de Compostela (USC), unha das alumnas do grao de Historia da Arte desenvolveu as súas prácticas curriculares no arquivo administrativo e na biblioteca da Domus Ecclesiae.

Durante o mes de febreiro, a estudante Ana Loureiro Maroño (Fene, 2002) realizou importantes avances no inventariado do fondo patrimonial da biblioteca (fondo antigo: obras ata 1901), desenvolveu tarefas de descrición arquivística e mesmo xestionou as redes sociais, con destacadas publicacións sobre as novidades editoriais recibidas na biblioteca. Ademais, como actividades complementarias á súa formación, tivo a oportunidade de visitar o mosteiro de Vilanova de Lourenzá e o Centro de Interpretación do Románico de Foz. Nos próximos meses ten previsto ultimar o seu traballo de fin de grao (TFG), centrado en aspectos artísticos do mosteiro de Santa María de Monfero, e continuar a súa formación na o ámbito dos arquivos e as bibliotecas, matriculándose nun master específico durante o curso 2023-24.

??? Con Ana Loureiro, alumna de Historia del Arte @UniversidadeUSC, en prácticas en la biblioteca #EstudiosMindonienses #Ferrol, visitamos la iglesia y el monasterio de S. Salvador de Vilanova de #Lourenzá (Lugo), declarado Monumento Histórico Artístico pic.twitter.com/GZ5TvtUKyY

— Estudios Mindonienses (@EMindonienses) February 15, 2023

Inventario do fondo antigo

Do informe preparado por Ana Loureiro sobre o fondo antigo (ata o ano 1901) da biblioteca da Domus Ecclesiae poden destacarse os seguintes aspectos:

· Número total de volúmenes: 349.

· Número de obras : 141 (século XVI: 1, século XVII: 1; século XVIII: 38; século XIX: 99; século XX (ano 1901): 1).

· Obras e autores relevantes: “Theatro critico universal” e “Cartas eruditas y curiosas” de frei Benito Jerónimo Feijoo, en edicións de 1769 e 1770; “El colegial o seminarista”, de Antonio María Claret, en edicións de 1864 e 1865; Juan Croisset e o seu “Año cristiano”, en varias edicións; unha Biblia de 1576, o libro máis antigo desta colección; o “Promptuario de la teología moral” de Francisco Larraga, de 1741; e o “Exercicio de perfección y virtudes christianas”, de Alonso Rodríguez, de 1758. Exemplares de todas estas obras, salvo a Biblia e o “Promptuario” de Larraga, xa forman parte do catálogo da biblioteca histórica do Seminario de Mondoñedo.

· En canto ás materias, prácticamente a totalidade deste fondo está composto por obras de carácter teolóxico, mais tamén se atopan obras filosóficas, como a “Philosophia thomistica” de Antonio Goudin; economía, coa obra “Memorias instructivas, útiles y curiosas sobre agricultura y comercio”, de Miguel Gerónimo Suárez; dereito, co “Diccionario de Derecho Canónico”, de Isidro de la Pastora y Nieto; e historia, coa obra “Historia de sucesos memorables del mundo” de Mr. de Royaumond.

Catalogación da biblioteca e consulta online

Durante os vindeiros meses está previsto o comezo do proceso de catalogación do fondo moderno da biblioteca, uns 16.000 volumes, que poderá consultarse online a través da páxina web https://estudiosmindonienses.biblio.gal. Tamén neste catálogo implementaranse os 28.000 números de revistas especializadas (700 cabeceiras) recibidas en intercambio co anuario “Estudios Mindonienses” desde a súa creación en 1985.