«A familia, fonte de esperanza», lema do Encontro de Axentes de Pastoral Familiar de Galicia

• Desenvolveranse os días 18 e 19 de outubro en Santiago
• Abordaranse cuestións como a pastoral dos maiores, a atención ás familias das persoas privadas de liberdade, o apoio ás familias que conviven con persoas afectadas pola enfermidade do alcoholismo e o acompañamento a divorciados voltos casar
• Invítase de forma especial a axentes da pastoral penal, saúde e maiores, ademáis do ámbito familiar

Baixo o lema «A familia, fonte de esperanza», o 18 e 19 de outubro de 2025, as delegacións de Pastoral Familiar das cinco dioceses galegas organizan un encontro interdiocesano de formación na casa de exercicios espirituais, Via Lucis, en Santiago de Compostela. Nesta ocasión, debido á temática que se abordará, a xornada está dirixida, principalmente, a laicos comprometidos coa pastoral familiar e a penal, a sacerdotes e membros da vida consagrada, pero tamén está aberta a calquera fiel que desexe profundar nestes temas.

Inscrición

A inscrición do encontro ten un custo de 85 euros por persoa ou de 150 euros por matrimonio. As persoas interesadas en solicitar máis información ou formalizar a súa inscrición poden chamar ao número de teléfono 692 11 53 55 (Mar) ou unha mensaxe ao email laicos@mondonedoferrol.org. O prazo remata o día 10 de outubro es as prazas son limitadas.

Folleto informativo (PDF)

Con carácter anual, as delegacións de Pastoral Familiar de Galicia organizan un encontro de formación para fortalecer o traballo en rede entre as distintas Igrexas locais e compartir as principais dificultades e retos do seu labor cotián neste ámbito pastoral.

Programa

O encargado de inaugurar estas xornadas de formación será o sacerdote da diocese de Tui-Vigo e formador do Seminario Maior Interdiocesano, Ángel Carnicero Carrera, quen realizará unha introdución das xornadas a través da mensaxe da bula de convocatoria do Xubileu 2025, Spes non confundit.

Álvaro Medina del Campo, director de Pastoral do Maior da diocese de Getafe e ex-presidente nacional de Vida Ascendente, abordará o tema da pastoral dos maiores e presentará algunhas iniciativas respecto diso.

Rodrigo Jesús Carcedo González, profesor titular do departamento de Psicoloxía Evolutiva da Educación da Universidade de Salamanca e director do servizo HIPRIFAM (Servizo de Atención Psicolóxica a Hijos de Persoas en prisión e as súas Familias), tratará o tema da atención ás familias das persoas privadas de liberdade.

Representantes da ONG Al-Anon presentarán o seu traballo de apoio ás familias que conviven con persoas afectadas pola enfermidade do alcoholismo.

Finalmente, o domingo 19, as xornadas clausuraranse co acompañamento a divorciados voltos casar, da man de Ángela R. Romero de “Enredados”.